俄烏戰事持續愈久，對烏克蘭亦是不利。客觀而言，中俄關係愈來愈好，對美國和烏克蘭都係如芒在刺。最近，烏克蘭總統澤連斯基向中國國家主席習近平放話，表示願意係基輔見佢，此舉被斥狂妄！阿哥，你算老幾？有求於中國卻斗膽要習近平去烏克蘭這個危險之地，如此目空一切，冇大冇細，有冇搞錯？

照道理，澤連斯基有求於中國，本應主動要求拜訪北京，這才合乎情理。當然，北京是否願意接見，那又是另一回事，起碼你做啱第一步！如今你叫習近平飛基輔，都真係睬你有味！外界有認為澤連斯基之所以向習近平放話，大有可能得到美國默許。

當然，所謂美國支援烏克蘭，民調反映共和黨議員和美國人民已愈來愈不支持向烏國軍援，鬼咩！自己國家經濟都好唔掂，加上美元霸權受到挑戰，尤其全球去美元化步伐明顯加快，好似中國和巴西達成協議，雙方貿易改用本幣交易，放棄以美元作為結算貨幣，總之，美元不利消息接二連三，老美內心唔焦急就假！

唯一出路：外交和談

澤連斯基一味就識得伸手，所謂長貧難顧，美國由去年1月到今年1月，對烏克蘭軍事援助金額已達到775億美元，根本就係無底黑洞！而且，俄烏戰事持續逾一年後，烏克蘭能打贏俄羅斯嘅機會愈渺茫！美國原以為打持久戰、消耗戰可以拖垮俄羅斯，那是太睇小普京嘅堅毅不屈和氣魄。

呢，德國前總理默克爾嘅軍事顧問埃里希．法德准將，如今也成了和平鬥士，佢指責「不用核武器就能擊敗俄羅斯」嘅想法過於天真。按照佢嘅分析，俄烏戰爭已進入了一個僵持嘅局面，成咗一個消耗戰。佢覺得咁消耗落去，根本唔係理性嘅軍事解決方案，唯一嘅出路係「外交和談」。

事實上，德國近排崛起一大班「和平主義者」，而且好多喺有頭有面嘅人物，個個希望俄烏早日停火。佢哋有一種憧憬，想像着與俄羅斯重歸於好嘅前景，因為佢哋堅定地相信：歐洲嘅長治久安，如果冇俄羅斯嘅參與係冇辦法實現嘅。種種跡象顯示，烏克蘭總統都似乎聞到燶味，再唔求和，再唔談判，遲早輸到四腳朝天好肉酸！

原圖：Володимир Зеленський Twitter影片截圖