回顧歷史，往往使人無限唏噓！

「中國人民站起來了！」1949年9月21日，在中國人民政協商會議第一屆全體會議上，毛澤東發表了「中國人民站起來」的開幕詞，這句簡而有力的話，讓中國人更懂得「站立」的重要！

70多年過去，時至今日，中國和平崛起，已是世界第二經濟體，統合國力亦已大大提升，中國人民不單站起來，中國係國際舞台亦愈來愈重要，甚且彰顯大國影響力。嗱！最新一個例子，莫過於中東兩大宿敵沙特阿拉伯與伊朗兩國，因宗教派別長期鬧得水火不容，關係錯綜複雜，伊朗更長期與海灣國家敵對，且係美國嚴厲制裁下更形孤立。
事實上，係伊拉克和阿曼等國多次撮合下，沙伊兩國有過多次談判，可是一直無結果！如今係中國斡旋下，同意係兩個月內重開使館、互派大使，並重啟兩國安全合作協議和經貿投資協議。

有論者睇到其中奧妙，就係沙伊雙邊關係確實係突破進展，是以中沙伊「三方聯合聲明」嘅形式公布，沙伊兩國都對中方牽頭主辦談判表達感謝。可見中國呢個「和事佬」嘅「牙力」的確唔簡單！難怪普遍認為中國今次成功斡旋沙伊矛盾，係中國外交嘅一大勝利，再度展現中國負責任大國嘅良好形象，對於中東乃至世界地緣政治格局嘅影響，以及中國嘅國際影響力提升，具有里程碑意義。

當然，沙特阿拉伯和伊朗最近同中國嘅關係突飛猛進，都支持並參與咗「一帶一路」倡議，並有意加入中國主導係上海合作組織與金磚組織，呢個都算「識時務者為俊傑」，皆因想發展經濟，靠中國乜都可以提供，唔通相信美國佬冇句真咩？

當然，國家主席習近平去年年尾到訪沙特，受到特別隆重嘅接待，其後雙方簽署34項投資協議，價值近300億美元。毛澤東話齋：世上沒有無緣無故的愛，中國受到沙伊嘅歡迎，豈是無因！說到底，中國以誠待沙伊，而美國卻不誠無物，一味要「美國優先」，你當全天下人都係儍仔任你點咩！

原圖：素材網

文章純屬作者個人意見，並不代表本報立場。