國際風雲變幻無窮，尤其係俄烏戰事踏入一周年之後，烏克蘭有美國硬挺，而俄羅斯有總統普京這種硬漢，那怕你烏克蘭舉美國及西方諸國之力支持，普京肯定只會加大戰爭力度，再對烏克蘭作雷霆萬鈞之追擊。

美國本意如何？大家都睇到美國總統拜登根本唔想俄烏停戰，從佢種種跡象瞓身挺烏，就係想烏克蘭總統澤連斯基變成一隻爛頭蟀，心口掛個「勇」字！反正美國出錢，烏克蘭出命，總之就是要拖垮俄羅斯，少個「眼中釘」，對美國係好事，可以集中精神對付中國！

呢，大家都睇到，美國都真係欺善怕惡！對住北韓，老美冇符！北韓領袖金正恩導彈射得不亦樂乎，老美就係吹佢唔脹！反而對住中國這個禮義之邦，一味惡人先告狀，早前嘅氣球事件一時就「諜影疑雲」，一時就「與中國無關」，正如有論者指出，認真娛樂性豐富，好睇過荷里活造夢工場拍嘅動物卡通片！

好嘞！你導彈射蚊子，又唔肯道歉，依家央求人家見面，語氣唔見絲毫歉遜：美國國務卿布林肯指中國絕不能夠再次侵犯美方主權，更警告唔好向俄羅斯提供致命性援助攻打烏克蘭，否則有嚴重後果云云。中方係俄烏問題上一直堅持雙方和談，可是美國及西方國家卻一直無限量供應軍援，咁美國警告中國唔好向俄羅斯提供絲毫援助，這不是「只許州官放火，不許百姓點燈」嘅邏輯嗎？

要和平解決還看中國

俄烏之戰打咗成年，據聯合國人權事務高級專員辦事處日前發表報告，指戰事近一年來，烏克蘭至少8006名平民被殺，13287人受傷，1400萬人無家可歸，近1800萬人需要人道援助。然而，戲子總統澤連斯基卻依然跟着拜登嘅指揮棒在起哄跳舞：我們會捍衛主權，會捍衛民主，會打敗俄羅斯！

此時此刻，也只有中國看到俄烏戰事再持續下去，對整個世界都不利，北京倡通過對話協商，以和平方式解決俄烏爭端，日前正式發布《全球安全倡議概念文件》，提出二十多項具體方向，其中堅決維護「核戰爭打不贏也打不得」，希望美俄兩方都能以大局為重！看來，俄烏之戰，要和平解決，還看中國！

中國不欲見俄烏之戰一直打下去，皆因中國要發展經濟，戰事雖然不是在中國領土打，畢竟俄羅斯都係近鄰，亦係核子強國，要是能夠說服普京停戰再來「和平協議」，點都有益於世界和平！依筆者看，繼中國外事辦主任王毅同普京會面後，如鋪排好國家主席習近平訪俄，俄烏之戰有望停火！雙方人馬俱疲，彼此都有損失，而且慘重。有個強而有力嘅聲音，此時此刻倡通過對話和平協商，說不定水到渠成！中國人嘅智慧：兵者，凶器也，聖人不得已而用之！

春天，是個生機勃勃嘅季節，何必戰火摧殘美麗嘅風景線？

原圖：新華社