各位，新一份財政預算案將於下星期三公布，市民都關心究竟財爺波叔會否再派消費券？一般市民，尤其基層市民自然盼望財爺繼續派，最好可以派一萬蚊，同上年一樣，即使派唔到一萬，都派五千吖！

點解咁多市民焦點會放係消費券上？皆因派定唔派，眾說紛紜，議員及行會成員亦有讃成唔派嘅，亦有學者甚至話派消費券如同「吸毒」！所持既理由多係指今年財赤必然逾千億元，加上外匯儲備又下降至約8000億元，一眾財金官員又一味游說政府，指庫房缺水，需要謹慎理財！總之，好多跡象都令人覺得政府想縮沙唔再派消費券！

何樂而不派

呢嗱！筆者幾時都贊成派消費券，甚至最好派現金，皆因民生多艱，經濟話就話復常，之不過疫荒3年，小市民捱得好辛苦，大部分工友搵少咗，有些甚至手停口停，依家市道因復常及全面通關係好咗，不過百廢待興，市民邊有咁快恢復到元氣吖！政府理應體恤民情，繼續派唔少於五千大洋嘅消費券，一來幫到基層，二來多多少少可以提振吓經濟，何樂而不派？

再講吖！有論者認為，本屆政府民望唔錯，特首李家超評分為57分，創下2018年9月以來新高；至於港府嘅民望亦同樣地反彈，滿意率淨值急增至12%，創造2017年11月以來新高。難得政府民望咁好，若然唔派消費券，即使冇一萬，派五千或三千都好過唔派，政府肯略紓民困，民望即使冇再升，起碼唔會咁快跌下來！筆者相信，若然政府「一毛不拔」，民望必然下滑！

事實上，來年經濟肯定會比疫荒時好。有學者指出，以本年度財赤千億元估計，呢3年間赤字總數約三千億元。要不是抗疫花掉約六千億元，根本就有盈餘。隨着市面復甦，經濟好轉，稅收自然會增加，何況疫情受控，抗疫花費已經大減。政府根本冇加稅必要。換言之，政府不必掩住荷包，應繼續派五千至一萬元嘅消費券。

呢嗱！學者又批評政府係抗疫期間，進退無度，錯失盡快復常之路；高官後知後覺，此時此刻，若然又廢噏甚麼因財赤而要市民縮衣縮食，豈非變相懲罰市民，點都講唔通！高官切勿太離地，不食人間煙火，公帑亦「取之於民，用之於民」而已！

派消費券要快，若議而不決，政府自毀勢頭，試問怎說好香港！

原圖：星島日報

https://www.singtaousa.com/2021-11-30/%e9%99%b3%e8%8c%82%e6%b3%a2%ef%bc%9a%e6%b8%af%e6%9c%89%e5%8a%9b%e6%88%90%e7%b6%a0%e8%89%b2%e9%87%91%e8%9e%8d%e4%b8%ad%e5%bf%83/3789692

https://std.stheadline.com/daily/article/2434788/