中美因一個「流浪氣球」再掀外交波瀾。這個流浪氣球，中方一直強調係「民用飛艇」用於氣象研究；而美國則認為係「間諜氣球」，質疑「民用」嘅解釋，並指氣球曾經改變路徑，意味可以透過人手操控，並非誤入，而係明顯「侵犯美國主權」。

美國政客習慣對雞毛蒜皮加油加醋，興風作浪已不是甚麼新聞。各位，還記得2003年，身為美國國務卿嘅鮑威爾係聯合國安理會，手持一瓶類似「洗衣粉」嘅不明粉末狀「生化武器」，煞有介事宣稱伊拉克擁有「大規模殺傷性武器」，提出對伊拉克發動戰爭！此後，美國入侵伊拉克，推翻咗蕯達姆政權，卻連條毛也找不到，倒令到伊拉克生靈塗炭，至今仍在艱難重建！

當然，今日之中國，又豈容山姆大叔耀武揚威！

呢！美國國務卿布林肯「自作多情」，藉「氣球事件」稱推遲訪問北京，已被中央外事辦主任王毅直接打臉：中美雙方都沒有宣布過甚麽訪問，美方發布有關消息是美方自己的事情，中方予以尊重。去年12月中旬布林肯啟動成立「中國協調辦公室」，俗稱「中國組」，話就話專門負責協調不同部門嘅對華政策，避免各自為政；其實說穿了，還不是為了長期作戰，對中國作出更有效嘅壓制，根本沒有存一點善意。

「氣球事件」令「對話總好過對抗」變成「對抗變成火花四濺」，中方除咗「堅決反對、強烈抗議」外，更「堅決捍衛中方利益和尊嚴，保留作進一步必要反應的權利。」中國語氣之重，令中美兩國嘅大國博弈更添詭譎元素！

價值不菲的政治騷

之不過，美國呢場「氣球事件」被嘲為小題大做，皆因呢場政治騒都幾貴！單係使用一枚AIM-9X響尾蛇導彈，花費約38萬美元，折約296萬港元去射落個氣球，仲未計出動嘅軍機和軍艦運作成本，被揶揄為「大炮打蚊子」，值唔值得呢？點講都好，對於美媒又可炒作挖吓新聞，又令美卿推遲訪華找合理下枱階，甚至可為新任眾議院議長麥卡錫可能竄訪台灣提供理由！花一千幾百萬算乜吖！援烏軍費都以百億美元計喇！

不過，依筆者看，雙方貴為世界第一及第二大經濟體，兩國官員畢竟係國際舞台上不能不相見，何況去年中美貨物貿易達到7600億美元！為咗個「流浪氣球」搞到劍拔弩張又何必呢？拜登為了明年競選連任，對中國點都要處處表示「硬起來」，情不由己，中國也應該看得出來！目前「保持定力，減少誤判」最重要！

原圖：拜登FB、TVB視頻截圖

https://www.facebook.com/photo.php?fbid=221082377162931&set=pb.100077835098866.-2207520000.&type=3