世界亂成一窩粥！俄烏戰事、以巴衝突！加上英國、法國大罷工！試問何處有淨土？

事實上，虎去兔來，並沒有迎來「兔氣揚眉」，迎來嘅係更多不安！

政客連自己國內嘅事都搞唔掂，卻愛到處撩事生非，此世界所以難有安寧也。就以英國為例，超過50萬僱員參與早前大罷工，教師、大學教授、公務員、邊防人員、鐵路員工及巴士司機齊齊加入，不滿薪酬增幅追唔上通脹。英國國家統計局最新數據顯示，單係去年11月嘅工潮共損失46.7萬個工作天，創自2011年以來新高。英國智庫經濟與商業研究中心統計，截至今年一月嘅八個月間，罷工潮導致經濟損失17億英鎊。

英國民生多艱，照道理執政者應致力於搞好經濟，疏導民怨先係！可惜為政者不但冇「先安內」，卻好做架樑！呢！英國下院防務委員會正探討擴展澳英美三方安全聯盟（AUKUS)，畀日本和印度加入，都唔使問阿貴，又係執美國佬口水尾，話要聯手抗拒中國喎！正如中方外交部指出，美英澳呢個安全聯盟，本質上係通過軍事合作挑動軍事對抗，係典型嘅冷戰思維，加大了核擴散危險，亦加劇亞太嘅軍事競賽，破壞地區嘅和平穩定。「天下本無事 ，庸人自擾之」就係咁解！

英國已非昔日之「日不落帝國」，好心就安份守己喇！講真，菲律賓就醒好多！知道自己國力小，要「討口飯」吃，就要力求「平衡」。呢方面，筆者覺得菲律賓做得好。
呢，不妨睇下美媒報道，美軍繼大規模調整係日本嘅軍事部署，又希望達成協議，讓菲律賓向美軍開放多4個軍事基地。美國就話會向菲律賓提供包括無人機在內嘅軍事援助，以便菲軍能夠監察南海情況。

阿哥！美國佬明明要係軍事上處處圍堵中國，又假惺惺話要「援助菲律賓」監察南海，擺菲律賓上枱，如此吹縐一池春水，干卿底事？

事實上，中國係菲律賓嘅最大貿易伙伴，小馬可斯自去年6月就任總統以來，同年9月即出訪美國，顯然係想修補上任杜特爾特與美國關係嘅窘局，之但係又要對中國表示友好，是以上月初旬到訪中國晤習近平，雙方發表聯合聲明將重啟南海油氣談判，妥善處理海上問題。

面對中美角力以至台海衝突風險，小馬可斯深明平衡不易，佢引用非洲諺語指「兩象相爭下，唯有草地輸」，小馬可斯話「我哋就係那片草地，而中美就係那兩頭象，所以我哋要非常、非常謹慎」。小馬可斯知道自己嘅處境，有自知之明，不像英國，冇大本錢卻要做大買賣，最終只會輸得一塌糊塗！

原圖：小馬可斯Twitter

https://twitter.com/bongbongmarcos/status/1614569831290011653/photo/1