據入境處數字顯示，由2020年7月起至今，淨移出嘅人口超過40萬。這當中肯定有筆者唔少親朋好友，每個人離開都有不同嘅理由，並不一定關乎政治。要言之，家家有本難唸的經，像好友鍾Sir一家，夫妻加一對仔女，在港居住了大半生，兩公婆從事教學早已退休，仔女亦學業有成，一考獲大律師，嫁人後已移民新加坡，一子在港大任教金融，兩公婆早供完兩層樓，衣食無憂，可謂人生勝利組。

嗱！鍾Sir一家植根香港，香港可以話給予佢豐盛人生！然而，係2020年7月一家卻毅然移居台灣，給筆者嘅WhatsApp道出因由，原來佢個仔受聘於台灣國立政治大學國貿系。筆者相信條件應該唔錯，一家人住喺政大教職員宿舍，佢拍給我看的相片，露台對住景美溪，一片綠油油，地方相當寬敞。筆者內心嘀咕，連港大都唔肯留低而去台灣執教，乜香港真係咁差咩？

勞福局局長指，本港過去兩年流失約14萬勞動人口，無可否認部分人已經離港，以25歳至39歲人口減幅最明顯，流失達7.8萬人；另高技術人才減少8.8萬人。其實，稍為留心吓新聞，都知連教師、醫護等都流失唔少。之不過，高官就話本港「固有吸引力」未減，好似背靠祖國、聯通世界、稅制及普通法制等優勢，何況疫下流失人才情況非香港獨有，總之最緊要「定」，要有信心，毋須郁吓就同新加坡作比較喎！

高官經常自我感覺良好

筆者又覺得高官經常自我感覺良好！人才流失已是不爭嘅事實。依家政府成日話要「搶人才」，幾咁有霸氣！呢，特首過去一年剛發表嘅《施政報告》就提出多項「搶人才、搶企業」嘅工作，不久前又宣布將開展一系列措施，包括啟動「高端人才通行證」、開通「人才服務窗口」線上平台等計劃，搶人才搶得不亦樂乎！

其實，特首剛過去又成立咗「特首政策組」，其前身原名係「中央政策組」，由英國人顧汝德係1989年出掌，直至殖民管治結束。有論者指出政府正名為「特首政策組」，係實事求是和去神秘化，主要為特首嘅施政配好望遠鏡及放大鏡，不再重犯決策嘅短視和盲目錯誤。筆者倒認為，「特首政策組」當務之急要為香港這麼多移居人口作一個調查及詳細分析，看看何以這麼多人不再覺得「香港幾好都有」一味要走！否則，搞咁多大龍鳳去搶人才，情況同市民每逢疫情，不管係沙士、禽流感、輻射疑惑，民間不是盲搶鹽、搶醋、搶口罩，就係搶板藍根一樣叫人失笑！

呢，新年伊始，筆者收到移居台灣嘅鍾Sir即興之作：

陰霾總有晴明日，

來歲願無心翳時；

際此年終托螢幕，

遙祈適意更康怡。

事實上，「心翳」轉「適意」和「康怡」，都係一種心態！

要是能改變移居港人嘅心態，重拾「香港幾好都有，點捨得走」，「人才」根本不必「搶」，只要「適意」，筆者相信走咗嘅，自自然然都會擇日歸來！

原圖：星島日報

https://std.stheadline.com/daily/article/2503937/