用寬容嘅胸懷，去照顧有需要嘅小朋友，呢種精神令人感動！駐守新界北衝鋒隊嘅警署警長阿志，2018年同做化妝師嘅女友Isabel結婚。為咗更好咁幫助家庭不幸嘅兒童，2021年初，佢哋決定申請做寄養家庭，獻出自己嘅愛心，至今已經先後照顧咗7位小朋友。

呢個決定，為佢哋嘅二人世界帶嚟咗意想不到嘅變化。對於太太Isabel 嘅建議，阿志全力支持。原因係阿志表示喺執行職務嘅過程中，處理過唔少涉及家庭問題嘅求警協助個案，佢經常為生於呢類家庭嘅兒童感到痛心。所以對於妻子嘅提議，可以為有需要嘅無助兒童提供一個安樂窩，佢覺得非常有意義。

2021年12月，佢哋終於如願以償成為咗寄養家庭。至今佢哋兩夫婦已經先後照顧過七名年齡介乎1至8歲嘅兒童，大部份都曾經遭受虐待或者疏忽照顧而需要接受短暫寄養。

阿志表示佢哋同一般家長一樣，同樣需要起身餵夜奶同埋掃風，接送在學嘅兒童返學放學，亦曾試過喺凌晨落更返屋企瞓四個鐘之後，就起身接送寄養兒童由荃灣住所去到將軍澳返學。

Isabel表示，佢同丈夫都願意付出更多嘅心機，幫助寄養兒童提升學業，假日亦會帶佢哋出去玩，希望俾多啲生活體驗佢哋。

阿志同佢太太嘅善舉實在難能可貴，認真抵讚，支持你哋！

原圖：香港警察