自從俄烏戰事爆發後，一眾西方國家正義俠上身，跟從美帝同一口逕，紛紛譴責、制裁俄羅斯。做完正義俠，先至醒起，原來大家都係依賴緊俄國提供嘅石油同天然氣供應，唔鬧都鬧咗，冇得返轉頭，結果就局住捱「貴氣」，今年8月，天然氣單價就由平時大約每兆瓦時100歐羅，飆升到每兆瓦時275歐羅，政客做嘅決定，轉嫁畀人民承受，到底係邊個錯？肯定就唔會人民囉！

面對燃料荒，應該點做好？說話就講咗出口，想話收返咩？收得到都肉酸啦！何況仲要睇住美帝台戲，局住企硬啦！歐盟方面就出咗條屎橋，設定「價格上限」。佢哋喺12初達成自己嘅共識，將入口自俄羅斯嘅石油定下每桶60美元嘅上限。點為之佢哋自己嘅共識？就係買家單方面嘅定價，俄羅斯冇話接受呢個價位，有權唔賣畀你囉！

定完油價，之後就輪到天然氣12月19日，歐盟成員國能源部就決定將俄羅斯天然氣價格定為每兆瓦時180歐羅，即係大約1477港紙。佢哋話除咗可以紓緩歐洲國家嘅能源危機，仲可以進一步打擊俄羅斯經濟，削弱俄羅斯喺烏克蘭發動戰爭嘅資金。

設定咗價格上限後，如果天然氣價格連續3日超越每兆瓦時180歐羅呢個數，便會觸動機制，之後最少實施20個工作天。20個工作天後，如果價格回落到低於180歐羅，就會撤銷上限。

由買家定價，聽落好似冇得輸，但係就畀人批評幾乎唔可能實現，因為12月19日，天然氣價格只係112歐羅，佢哋定個咁高嘅上限，又邊幫到緩解民困？

另外，俄羅斯方面又會唔會任由你定價？克里姆林宮方面指責歐盟做法係違反市場定價機制，干預市場操作。事實又係呀，西方唔係乜都講自由咩？到自己冇著數時就走出嚟干預，輸打贏要，有冇搞錯？仲要定價定得無厘頭，兩邊都唔順你，點救亡呀？

歐盟呢個價格上限，係自己單方面決定，但係要知道，交易係要雙方同意，你肯買時我未必肯賣喎！貨喺俄羅斯手，唔啱價咪唔賣囉，真係睬你都戇！