牢記歷史，先可以令後人唔好再重蹈覆轍！早前，美國一間當舖老闆就收到一本內含超過30張二戰時期日軍喺南京犯下大屠殺罪證嘅彩色照片。佢早前喺個人社交平台上公布照片，引起網上熱議。17日，佢親手將呢本珍貴嘅二戰歷史相簿捐贈畀中國駐芝加哥總領事館代表。

凱爾表示，呢本相簿對於中國歷史研究具有重要參考意義，好榮幸自己能夠以和平、友好嘅名義捐畀中國。佢仲上載咗中國駐芝加哥總領事館畀佢嘅一封信。信中提及，日軍當年喺中國犯下嘅戰爭罪行，係「人類歷史上最黑暗嘅一頁」，並向凱爾表示，佢嘅善舉「一定能激勵大家用善良嘅心去維護和平」。領事館將會繼續致力於中美人民之間嘅文化聯繫同友誼。

凱爾對日本歷史亦頗有研究，佢喺讀明尼蘇達大學時係主修日本研究，學習過日本侵華乃至南京大屠殺嘅歷史。佢仲表示，曾經因為核實呢本相簿上照片嘅真偽而受到網上欺凌甚至「死亡威脅」。但佢堅持，呢本相簿絕不會交畀私人收藏家或者日本政府。

好！呢位美國當舖老闆尊重歷史，敬畏歷史，將彌足珍貴嘅照片捐贈畀中方，希望能夠透過呢啲照片，令後人對南京大屠殺有更深嘅了解。

原圖：Evan Kail Twitter

https://twitter.com/EvanKail/status/1593055951917289472/photo/1

https://twitter.com/EvanKail/status/1565271637913735172/photo/1