再有藍營群組被Facebook刪除！尋日（30日）上午，擁有11.6萬成員嘅Facebook「Save HK」群組再次被刪除，係該群組自2019年創立以嚟嘅第二次。群組創辦人、新民黨黨員何敬康坦言好意外，「唯有重新出發」，並已經即時開啟新群組「Save HK 救救香港 2.0」。截至今日（31日）正午，已有1.4萬成員加入新群組。何敬康同「Save HK」並冇氣餒，跌倒後再企返起身，抵讚！

何敬康發帖表示，30日清晨4點30分左右，仲未瞓嘅佢發現Facebook要刪除「Save HK」群組嘅消息。佢表示，自2020年12月群組第一次被刪後，一直努力遵守社群守則，並同Facebook保持溝通，增進聯繫。佢坦言，對群組再次被刪感到非常意外同失望，但「既來之則安之，唯有重新出發」，直言「這是我們中國香港人的特質」，於是即時設立新嘅群組，希望同大家繼續發聲。

眾所周知，2019年香港黑暴，香港街頭暴力示威無日無之，香港人嘅人際關係大撕裂，愛國嘅香港人連喺街上撐國家都要冒住生命危險。何敬康有見及此，希望創立一個可以畀愛國愛港之士互相「呻」嘅群組，先至會有「Save HK」群組嘅誕生。

回望何敬康設立「Save HK」嘅初心，我哋真切感到愛國群組喺社交媒體運作嘅唔容易。作為愛國愛港嘅一份子，見到「Save HK」企返起身，我哋梗係繼續支持！我哋相信，新群組將會煥發生機，令真心撐港嘅聲音傳得越遠！

歡迎大家加入新群組「Save HK 救救香港 2.0」，繼續勇敢發聲：

https://www.facebook.com/groups/504230744941028/?ref=share_group_link

原圖：何敬康FB

https://www.facebook.com/adrianhosavehk/posts/pfbid0T6oVWUXK4F97Tgo33gJmfcU8YYAdEnomJp35BbRvqa1ViogiH3btagnuW9UrXezBl