有大狀黨之稱嘅公民黨，可能因為冇人接手而要解散。作為公民黨嘅創黨成員，行政會議成員湯家驊尋日（18日）喺佢社交專頁發文，回憶當日公民黨係點樣一步步走上歪路。當佢發現黨同當初嘅理念已經背道而馳，於是選擇喺2015年退黨。湯家驊好感觸咁表示，喺香港如果要揀政治呢條路，最緊要就係要堅守自己嘅理念同原則！

湯家驊表示，見到自己有份創建嘅公民黨走到今日咁嘅地步，感到「無限唏噓」；但有因必有果，早喺2009年，公民黨決定同社民連搞五區公投，企圖推翻原有嘅選舉制度，佢同一位學者喺黨內大會表示反對，但係有激進黨員竟然公然作出指罵，從嗰時開始，佢已經預感公民黨會走向滅亡。隨後五年幾，湯家驊想將公民黨拉回正軌但失敗咗，於是決定退黨並成立智庫「民主思路」，希望透過研究及培訓，「提升特區政治意識和民主質素」。

湯家驊仲話，捱過黑暴低谷，經歷過核心成員離開，而家嘅智庫變得更成熟同有影響力，同時，亦令湯家驊明白到「生死存亡有時只在一念之間」，一定要堅持從政嘅初衷，公民黨嘅經歷就係最好嘅反面教材。

公民黨用佢哋嘅慘淡收場證明，民心向背唔會成功，反中亂港勢力嘅圖謀永遠唔會得逞！

原圖：湯家驊Facebook

https://www.facebook.com/story.php?story_fbid=pfbid0HNBL1gfn7Ysb6NdNkYPMdKVMbwo1kw1M98qTdnbNVzeojx87JG8kUfvwEDjto4YSl&id=100044308665537