好耐冇見嘅黃之鋒又大一歲啦！原來噚日（13日）係前香港眾志秘書長黃之鋒嘅26歲生日，佢嘅社交平台管理員帖文，話「不經不覺已兩年無法與之鋒同慶生日」，即係話黃之鋒已經喺獄中度過第二個牛一。

黃之鋒之前共被判監23.5個月，雖然今年3月已經服刑完畢，但因涉攬炒派35+初選案，所以要繼續還押。佢早前已經認罪，依家喺赤柱監獄還押，等緊上庭答辯。

前議員邵家臻亦喺社交平台貼文贈興，話就算今日已經係在囚585天，都要同黃之鋒講聲生日平安，遲啲見。但黃之鋒仲有單初選案未找數，都唔知幾時先出得返嚟，呢句遲啲見，真係難聽過粗口咯。

黃之鋒嘅生日帖文附上「26歲的你，未來見」，管理員仲講到，有同黃之鋒傾到最新嘅高達動畫，又懶煽情咁話「期待在不遠的未來，每一位失去自由的手足都能得以歡慶。」

小編唔知呢班手Joke要等幾耐先可以歡慶，不過既然係黃之鋒生日，緊要好好贈興啦，就祝你長踎長有，年年有今日，歲歲有今朝啦！

原圖：星島日報、素材網

https://std.stheadline.com/realtime/article/1215424

https://www.cleanpng.com/png-birthday-cake-png-clip-art-21161/download-png.html