面對美國嘅經濟困局，拜登一於少理，依然信心滿滿！日前，摩根大通行政總裁戴蒙喺接受傳媒訪問時話，對美國經濟前景唔樂觀，預料喺未來6至9個月之後美國經濟就會陷入衰退。對於戴蒙睇淡美國經濟，美國總統拜登就回應話唔會，不過佢都留咗「後著」，話就算美國真係經濟衰退，都只會係輕微下滑喎！

拜登解釋，因為好似戴蒙咁樣嘅言論「每六個月就有」，而且，所謂嘅衰退都仲未發生。不過佢今次就好醒，畀自己嘅言論留返少少後路，佢話就算美國真係面臨經濟衰退，都只會「稍微往下走」，而且佢認為發生嘅機會好低。

同拜登所講每六個月就有一次嘅唱衰美國經濟言論唔同，今次「唱衰」嘅人士唔少，而且仲粒粒皆星，相當之有國際地位，其中包括世界銀行行長馬爾帕斯同國際貨幣基金組織總裁喬治艾娃，佢哋兩位齊齊喺10號表示，就連就業形勢理想嘅美國，都避免唔到好似而家嘅歐洲咁，走向萎靡嘅衰退態勢。

無論係金融大鱷講嘅，定係世界兩大金融機構嘅最高領導人講嘅，拜登一於唔聽、唔理，依然覺得美國係所向披靡！真係唔知佢邊度嚟嘅自信！？

原圖：素材網、YouTube視頻截圖、拜登Twitter

https://twitter.com/JoeBiden/status/1574058156308762625/photo/1