港大首席副校長、經濟學講座教授王于漸表示，香港嘅競爭優勢在於人力資源、專業服務和誠信標準、各種模型資本優勢，以及法律制度；香港應透過招聘海外人才及投資本地人才擴充知識人才庫，而降低入境簽證門檻以吸引國際人才係重中之重。

王于漸敎授所言，筆者絕對認同，王教授指出，對於本港嘅金融中心排名，不敵新加坡而降至第四位，佢認同本港情況已經響起警號，但認為僅是疫情之下嘅短暫變化，故只要採取類似新加坡嘅防疫政策，人才自然會回來，經濟地位也會從疫情消失而恢復往昔。此外，港大經管學院發表「香港經濟政策綠皮書2022」，當中8篇文章，其中一篇話為實現大都會願景，應網羅人才，每年引進10萬人，2025年內容納1000萬人。

人才並非靠「搶」

嗱！對於引入人才，特首李家超都不敢怠慢，佢唔單止話要引人，直頭話要「搶人才」添！之不過，客觀形勢似乎「搶」之不易！眾所週知，本港人口連續多年下跌，加上出生率又下降到2021年嘅每1000人中只有約5人出生嘅低水平，再加上人口急速老化，而且近年來，移民之聲不絕於耳，港府聲大大要搶「人才」，實情係勞動人口都在減少！依家仲話要每年引進10萬人才，平心而論，確實有相當難度！

正如有論者指出，人才並非靠「搶」就得，你估王老虎搶親靠惡恃勢就得啫！與其話「搶」，不如話如何「吸引」更靠譜。筆者認同要吸引人才，要視乎一個地方嘅入境政策、福利、生活便利程度，甚至空氣品質、政治氣氛等，呢啲都會影響人才落地生根嘅意願。

新加坡依賴外來人才

新加坡係吸引人才方面確係耍家！皆因新加坡自建國以來，相當依賴外來人才，是以工作簽證種類多，乜人才都要。至於吸引創科和頂尖人才更從不鬆懈，呢，當地政府8月尾才宣布推出新嘅「海外網絡和專業簽證」計劃，申請人過去一年嘅月薪要達3萬坡幣（約16多萬港元），或抵達新加坡後會賺到同等月入；至於係科技和學術方面有卓越成就嘅個人，不需達到月入門檻亦有機會獲批。呢個計劃無疑保證真係吸納到頂尖人才而非豬隊友！是以香港要每年引進10萬人才，憑乜呢？

呢，早前創新科技及工業局局長孫東又指係培養人才方面，現時香港嘅STEM(科學、科技、工程及數學）教育，與新加坡和內地相比都有所不及，咁即係要係質上提煉而非係量上計較喇！疫慌下經常上網課對教學必有影響！更何況一場黑暴反映香港教育千瘡百孔，今之大學生據悉連見工都口窒窒，表達辭不達意！是以筆者反而認為當務之急，睇怕要先培訓好自己嘅人才，再進一步去「搶」吧！

開學咁耐，筆者留意招聘教師，甚至校長職位仍相當多！這意味教師流失率確相當多！筆者認為，先「固本培源」搞好本港之教育，從幼稚園抓起，一步步來，所謂「根深不怕風搖動，樹正無愁月影斜」也！花香引蜂蝶，海清珊瑚生，只有這樣，或許可以每年引進10萬人才！

原圖：星島日報

https://std.stheadline.com/realtime/article/1260521/