有關高爾夫球場撥出9公頃建公屋，提供1.2萬個單位，畀約3萬人可安居樂業。可惜，計劃遇到諸多阻滯，甚至有貴為行會成員者反對，指要吸引海外人才就要有高爾夫球場，似乎認為打少兩個洞用來起公屋就吸引唔到海外人才。

各位，實際上擁有高球會籍嘅唔多，高球會自1986年發出最後一批會籍後一直塵封，球會係2019年重新發出新會籍，但從未向外公開說明，至今新發會籍36個，每個售價約為1680萬港元。可以話，擁有會籍者必係權貴！他們卻出來說三道四阻礙高球會撥出區區9公頃建公屋，難免受到質疑。

香港嘅房屋問題困擾歷屆政府，其中劏房環境惡劣，租金又貴，更是討論嘅焦點。全港劏房料逾10萬間，有約22萬居民「屈室求存」。劏房居住環境之不堪，連阿爺都關注，期盼政府能改善民生，令基層告別劏房、籠屋。上屆政府臨落雨收柴，先來廢噏甚麼「前人種樹，後人乘涼」，實情係公屋輪候冊愈積愈厚，市民上樓平均要等6.1年。本屆政府主張「以結果為目標」，係房策上要「提速、提效、提量」，又提出「公屋提前上樓」計劃，用心良苦。

社會需求不等人

講真，只要令基層告別劏房，盡快上樓，基層嘅幸福感先會返來！事實上，發展「北部都會區」、「明日大嶼」等，全部十劃未有一撇，建得來，幾快都好，亦需要一段時間，真正係遠水難救近火！正如香港社區組織協會主任何喜華所講：社會需求不等人。筆者絕對認同：任何土地發展必須平衡各方面因素，住屋需要、就業發展、排污設置、對自然生態等環境因素均要考量，任何評估亦需要有一定時限，不可無了期地進行；社會需求不等人，若任何發展一拖再拖，誠非最大公眾利益。旨哉斯言！政府要說好香港故事，要係「房事」上提速、提效、提量，就要如阿爺要求新班子：要敢於破除利益固化藩籬。權貴打少兩個高球洞，天不會塌下來，人才不會因而不來！

劏房基層可盡快上樓，一天都光晒！「民有所呼，我有所應」，取信於民，良政善治，不說自明！阿爺必看在眼裡！

原圖：星島日報

https://std.stheadline.com/daily/article/2472363/