新郎唔見咗，婚禮點收科？不過，新郎並唔係逃婚，背後原因非常感動！事緣近日內地雲南一場婚宴上，新娘子帶着「老公仔人形紙牌」接受親友們祝賀，引起網民關注。大家都問真人去咗邊呢？原來該名新郎係一名森林消防員，早前奉召到重慶協助救火，但因任務延誤趕唔到返女方家鄉擺酒。新郎明言對妻子感到愧疚，幸好親友得知原因也明事理，大讚佢係出色嘅救火英雄！

新郎敬一良職業係森林消防隊隊員，佢得知有新任務延誤時，個心當然唔好受，都唔敢致電妻子，「怕打電話的話我這邊繃不住，然後她也繃不住，所以說猶豫再三我還是決定發微信，既給她報平安也讓她放心，同時也說出我心中對於她的愧疚和保證」。

敬一良後來亦從家人的電話群組中得知，妻子進行敬酒時，不但零怨言冇嬲豬，其哥哥亦代兩人主動向親友們解釋他缺席的原因，幸好，親友們都非常明白事理，接納呢個暖心理由，更大讚新郎哥係救火英雄，向佢嘅敬業態度致敬。

事後，唔少網民紛紛大讚呢對新人，男嘅盡忠職守，女嘅體貼溫柔！「心疼消防員，為了人犧牲了自己的幸福」、「謝謝你能夠識大體，捨小家顧大家」、「你的新娘真的是一位好女孩，真心的祝福你們」、「英雄甘於奉獻，親人同樣可敬」。

祝福呢對新人幸福美滿！

原圖：影片截圖