《無窮之路2：無價之保》即將喺8月25號（下周四）播出，相信大家都非常期待！主持陳貝兒希望藉住今輯節目，令更多人了解內地環境保育嘅情況，多啲珍惜愛護環境。佢亦希望城市人可以跨出石屎森林，世界唔止有電子嘅冰冷數字，而係認識到呢個世界仲係「有山有水有動物」，學會共存，同時珍惜及保護地球。

新一輯主力講環境保育問題，攝製隊走訪咗更多地方拍攝。上一輯用三個月去咗六個省份，而今輯喺兩個多月就去咗十幾個省份，時間更緊迫，絕對係非常艱巨嘅拍攝旅途。雖然辛苦，但陳貝兒話呢個經驗絕對令佢大開眼界，畢生難忘。

《無價之保》以保育同保護環境做主題，真係名副其實「上山下海」、由中國最北走到最南。上一輯上咗天梯，今輯就要爬天山。陳貝兒拍攝中除咗經歷嚴寒低溫症外，亦曬傷咗皮膚。佢唔係因去高海拔地區而曬傷，原因反而係去海南嘅海底拍攝海洋生態，為免污染水質就無搽防曬，笑稱上岸後照鏡，發現自己曬到好似變咗包公添！

陳貝兒印象最深刻嘅，就係第一、二集踏足無人之地青海「可可西里」無人區。嗰度係國家一級保護區，更被譽為「生命嘅禁區」。攝製隊能夠走訪此禁地，真係非常難得嘅機會。佢話有個說法係：嗰度每踏出嘅一個腳印，就係人類嘅第一個腳印。佢話「《無價之保》係保護和保育，亦語帶雙關代表環境係人類嘅無價之寶，如果被破壞咗係很難修復嘅，希望大家要多多珍惜。

今輯嘅內容真係好豐富，同時亦非常有意義，期待播映！我哋一齊睇睇國家如何保護環境，多認識美麗嘅祖國！

原圖：陳貝兒微博

https://weibo.com/1698895343/M1kMqDpTm