新一屆政府，上任個多月，即雷厲風行推出「政府打擊衛生黑點計劃」，重點全城600多個黑點、加強滅鼠、打擊隨地亂丟垃圾惡疾！計劃為期3個月。嗱！歷屆政府過去都有類似大行動，之不過常被批評雷聲大雨點小，每次大行動，一陣風後就打回原形！大行動變大龍鳯，全都係筲箕兜水——錯漏百出！

今趟就唔同喇！由政務司副司長卓永興帶領嘅「地區事項統籌工作組」牽頭，針對問題，分好負責部門，換言之，亦即釐清權責，咪好似以前咁彼此互相推諉，各自為政！

筆者以前都講過，清潔香港運動唔使全港做，好似香港山頂、半山區、淺水灣等，九龍方面嘅九龍塘、何文田傳統豪宅地段等，使鬼政府去推行清潔運動咩！

講真，呢啲豪宅地段，只要樓梯口發現隻曱甴，分分鐘冇18個工人飛撲出來都有半打出來追殺隻「小強」啦！效率一定高過食環署千百倍！筆者咁講，係因為之前林青霞豪宅火燭，有成18個工人，一人捧着一籠寵物出來！所以政府鎖定衛生黑點，好似油尖旺啲「三無大廈」、深水埗舊區等重點大掃除和大消潔，唔好話3個月，睇怕3星期都應有啲成效！

之但係，有媒體到荃灣及九龍城視察，發現部分地點雖有衛生問題，卻不在名單内。嗱！呢方面有關當局就要多跟進，有遺漏就補鑊，只要真心誠意去做，唔好吞泡hea做，筆者相信會做出成績！

屢勸不改 應該重罰

卓永興又話亂拋垃圾定額罰款由2003年起提高至1500元，要檢視執行近20年嘅定額罰款是否有效力。有議員認為應針對屢勸不改者，例如長期霸佔後巷等，建議政府可考慮引入「累進制」針對積犯，呢方面筆者倒認同！刁民屢勸不改，當執法人員冇到，應該要重罰！

至於亂丟垃圾罰1500蚊，政府據報擬加罰款！筆者認為，民生多艱，咁嘅環境下，政府唔應該再諗「寓禁於徵」！現階段，政府必須努力做好本身大清潔衛生黑點工作，市容舊貌變新顏，自然就冇咗「破窗效應」，周圍塵都都冇一粒，邊有人會亂咁丟垃圾啊！

筆者誠心希望新政府係打掃衛生黑點和捕鼠上有所突破，往者不可諫 ，來者猶可追！正如台灣索模林志玲小姐對做善事者話齋：只要有愛，只要有心！清潔香港運動，踏出正確一步，集中去掃除衛生黑點，同樣，只要真愛香港呢個家，有心為港挽回國際大都會、美食之城嘅稱讚，令香港變回幾好都有，點捨得走吖！相信繁榮穩定必矣！

原圖：星島日報、點新聞

https://std.stheadline.com/realtime/article/1162304/

https://www.dotdotnews.com/a/202208/15/AP62f9ccfbe4b0adad9d52b3e4.html