港府新安排於本月12日（星期五）將7天酒店隔離改為「3+4」，即3天酒店及4天檢疫。此外，消息指，透過「回港易」及「來港易」自內地及澳門入境，港府擬放寬內地來港限制，7日家居、酒店或其他住所嘅檢疫期至3日，與海外及台灣抵港人士「睇齊」。
事實上，真要「清零」已經冇可能，皆因源頭萬水千山縱橫，追蹤已冇可能，更何況大家都已有共識，不會當中招如世界末日，只當一般流感視之，反正打足針不是重症，居家隔離休息一周大概已可痊癒，冇乜嘢大不了！筆者家人十有七八已中招！有老有嫩，都居家隔離，大致一周後全部陽轉陰，冇乜大不了！
再講，隨着世界各地陸續解封通關，日常生活有序恢復；反觀本港，又豈能不顧及經濟及維護本港金融地位，放寬防疫及隔離政策？眼甘甘見人才資金等「肥水」流向競爭對手新加坡！生命有限流年易逝，再係咁蹉跎下去，凶多吉少。內地通關睇怕暫冇望，放寬防疫政策縮減酒店檢疫時間，吸引外地來客，確係明智亦係當務之急，如今港府走出正確一步，筆者為之鼓掌！
香港經濟靠金融、地產與出口；內地次季封城防疫，房地產一度出現危機，經濟至今未見明顯復甦，加上歐美經濟衰退，打擊需求。香港持續疫慌兩年半有多，經濟備受打擊，百業蕭條，失業率高企，唔少貧窮基層手停口停，都擺在眼前。
政府統計處不久前發表2022年第2季本地生產總值預先估計數字。眼看全球通脹重現，利息加完又加，不利投資，二手樓劈價成交湧現，政府仍老神再再，不動如山，連樓市「辣招」都未肯撤，香港經濟會逆境創奇？
嗱！據預先估計數字顯示，2022年第2季本地生產總值較上年同期實質下跌1.4%，而第一季嘅跌幅為3.9%。按本地生產總值各個主要組成部分分析，私人消費2022年第2季與上年同期比較，實質大致不變。香港經濟第2季雖有改善，不過改善程度較預期小；何況近期確診數字回升，加上金融狀況收緊，明顯影響咗季度後期嘅復甦勢頭。
外圍方面，環球需求減弱及內地與香港之間嘅跨境陸路貨運往來持續受阻，對香港嘅出口造成嚴重影響。所謂第2季有所改善，經季節性調整後按季比較，實質本地生產總值喺上一季下跌2.9%後，喺第二季反彈0.9%，實在微不足道。有經濟學者預計，出口表現疲弱嘅表現會持續，相信未來兩季仍會出現GDP負增長情況添！
筆者作為時事評論員，眼見香港連續多年蟬聯全球最長壽地區，之不過，港人長壽係唔係福氣呢？係香港，似乎未必，最主要係政府支援不足，長者難以安老。各位，係街上常見有長者佝僂着背在執紙皮，更多長者等安老宿位「等到死」；講真，有幾多老友記可以靠乜乜年金過優質生活吖！喺香港，唔少長者體會到嘅係「壽則多辱」，思之怎不令人心酸！
政府要說好香港故事，就係要多關心民瘼！而改善民生，除了快啲通關，不論同內地還是外地，都是「重中之重」，港人都知，中招已不值得驚恐，窮困先難捱！
原圖：星島日報
https://std.stheadline.com/kol/article/5144
https://std.stheadline.com/realtime/article/1755845/
投票已截止，多謝支持
返回
