講真，政策錯誤，就好似一塊好羊肉，卻落在狗嘴裏，梗係睇見都眼冤啦！譬如前朝政府招幕一批青年俊彥進入特區政府嘅諮詢委員會，更難以解決香港年輕一代面臨嘅向上流動及背後嘅結構性矛盾！因為呢一批能進入特區政府嘅諮詢委員會嘅青年，本身有良好背景和一定學歷，並非最値得「扶持」嘅一群！如此一來，只係為一小撮青年錦上添花，無助於解決大部分青年睇唔到向上流嘅曙光！
國家主席習近平強調，青年興，則香港興；青年發展，則香港發展；青年有未來，則香港有未來。習主席說得言簡意賅，佢一語中的指出，要幫助廣大青年解決學業、就業、創業、置業面臨嘅實際困難，為佢哋成長成才創造更多機會。各位，呢啲咪叫「明者因時而變」囉！要言之，制訂青年政策要懂得變化！
早陣子，有政黨公布受訪青年對青年政策嘅意見調查，青年人最關注係房屋政策，其次係增加向上流機會及工作生活與平衡。呢，推前一些，其實都係一樣！根據中大亞太研究所2014年底嘅調查，最多年輕人期望施政報告會優先處理房屋規劃。長期以來，香港整體樓價指數只升難跌，而年輕一輩收入升幅緩慢，點追都追唔上樓價升幅，點節衣縮食唔去日本旅行，都難以有足夠積蓄支付首期，是以「置業興家」對年輕人而言係遙不可及，「上車」只能依靠「父幹」或「母幹」。
年輕人一諗到自己即使大學畢業，搵到份工，起薪亦不過萬六、萬七左右，有些甚至更低。咁多年來，大學生嘅起薪點似乎冇乜點變！呢個其實幾令年輕人氣餒，搵雞碎咁多，慳啲勉強夠自己花費，仲要同父母住！你話年輕人點夠膽結婚生仔啊！以前話養個細路要4百萬，依家已經升到6百萬！難怪啲人愈來愈遲婚！即使結婚，如果份工唔係政府工或穩定啲嘅如教師，都未必敢生BB啊！香港出生率繼續低迷，2021年全球生育率，香港排223位，位列尾5！當年嘅特首林鄭月娥曾說：須多下功夫鼓勵生育！
之不過，事與願違，香港唔單止生育下降，更面臨人口老化及流失！
早前，教育局回覆議員提問時表示，喺2021/22學年，公營及直資學校嘅流失率亦創5年新高，分別達7.5%及8.4%，相較上一學年分別增加3.1%及3.4%，而流失人數方面，本學年公營學校教師流失人數達3580人，而直資學校亦達470人。教師整體流失率逾4,000人，恐怕當中唔少都係趕移民！有校長都表示，招聘教師嘅應徴信少咗9成，「教教吓書辭職」大有人在，一時請人都唔易！
事實都擺在眼前，師生再流失，殺校遲早來！教育靠嘅還是人，如果優良師資大量流失，教育質素如何保證？學生又流失，難怪有論者揶揄：想得天下英才而教育之固是奢望，連集「庸才而教之」都難如登天！所以話，新一屆政府任重道遠！筆者認為要重新出發，最重要係留得住人才！落實領導人所說的要幫青少年解決「學業、就業、創業、置業」呢四業問題，千祈勿再塗脂抹粉，一味吹水甚麼「與青年同行」，結果卻是阿崩叫狗，愈走愈遠！
原圖：星島日報
https://std.stheadline.com/realtime/article/1418261
投票已截止，多謝支持
返回
