近年唔少港人移民，其中一部分去咗英國，但佢哋又掛住香港嘅食物喎，例如係海味同埋中藥，就托在港親友寄嘢過去。但原來呢啲食物有唔少都唔畀寄去英國，如被海關發現，輕嘅就沒收，重則收件人會被判刑，甚至影響佢嘅居留申請添！

喺社交平台發現，香港有啲網店及實體店，推出寄貨到英國嘅服務，其中包括海味、藥材湯包等貴價食材。但英國設關稅及增值稅，呢啲食材價格高昂，如產品價值超過一定價格，郵件會被扣留，要收件人付咗稅後先寄出。有海味店為攬客想賺多啲錢，不惜走法律漏洞，聲稱會將食材統一申報做「Dried food（乾貨）」，以降低稅項，但其實呢個行為已屬違法。

英國規定，禁止從外地郵寄肉類、海鮮及奶製品；唔少植物類及動物類草藥亦唔畀入境，更喺當地被禁用。例如鮑魚、花膠等高價海味、包含冬蟲草、瑤柱等嘅「坐月湯包」；仲有連花清瘟膠囊，由於用蜜糖炒的麻黃，亦係英國禁用藥材之一。

嘆慣嘅港人唔介意高價郵費，但寄呢啲貴價食材可能會被列作違禁品！如果被人查到，罰錢事少，仲隨時影響居留權，咁就大鑊啦！都係一句，小心誤墮法網呀！

原圖：星島日報

https://std.stheadline.com/realtime/article/1858309