西風一夜催人老，凋盡朱顏白盡頭！

時光催人，本屆政府開局使人睇到活力！政府架構重整，除咗三司各開一個副司長職位，亦增設文化體育及旅遊局，同時多個政策局嘅分工重新洗牌，食衞局改為醫務衞生局，環境局改為環境及生態局，民政事務局改為民政及青年事務局，運輸及房屋局一分為二，其一是房屋局，其二是運輸及物流局等。

此外，特首李家超又指司長管轄範圍好廣泛、工作繁重，消耗統籌和指揮能力，所以有需要設立副司長分擔工作。方案涉及增添13名政治委任官員和57個公務員職位，總薪酬開支約每年九千五百萬元，副司長月薪將是三十六萬多元。

嗱！如果達到良政善治，多花近億元都係值嘅，反正庫房又不缺錢！ 

若然政府架構重整後做到嘢，房屋建快咗、衞生搞好咗、醫療改進咗（起碼等專科唔使等三至四年），仲有，老人家等公家宿位又快咗，喂！阿哥，如此立竿見影，咁就係真正提高治理水平，而唔係一味吹水甚麼「前人種樹，後人乘涼」喇！

筆者早前見屋宇署建議開設一個總屋宇測量師或總結構工程師嘅雙專業編外職位，專責新界村屋僭建問題，任期為兩年，年薪為190萬港元。講真，做得呢個位，除咗熟悉「僭建物」定義，更要知悉僭建物嘅法律，如果真係幫到執行新界村屋僭建嘅長期問題，月薪雖說近16萬元，都係值得㗎！

各位，不妨回一回帶，暫且回到剛卸任特首林鄭月娥2011年任發展局局長之時，佢當年意氣風發，表明要嚴打新界村屋僭建，「一視同仁」清拆，僅讓小型嘅僭建物如冷氣機支架、曬衣架和小型簷篷有核准計劃。結果呢？「好打得」嘅林鄭換來鄉紳火燒「林門鄭氏」紙紥公仔和棺材。11年過去了，新界僭建村屋還不是遍地開花！

可見搞呢壇嘢真係唔容易，依家屋宇署主動話要新增個職位專責搞呢個「燙手山芋」，點講都係勇氣可嘉！遙想政府處理有關僭建嘅效率慢過蝸牛爬而備受抨擊。1996、2004及2011年，申訴專員曾針對新界村屋違例僭建問題，進行過3次直接調查，批評屋宇署及地政總署執管不力，有欠積極。

國家主席習近平對特區政府提出「四點希望」，其中一點就係着力提高治理水平、不斷增強發展動能、切實排解民生憂難和共同維護和諧穩定。事實上，香港要「追趕」的事情太多，特區政府如能「理順」新界村屋僭建問題，筆者覺得其「迎難而上」的勇氣確十分值得肯定！

事實係申訴專員公署鑑於新界村屋多年來僭建毫無改善，曾展開不少主動調查及建議當局如何執管，可惜冇乜成效！如今且看若增了一個雙專業編外職位，把新界村屋僭建如此棘手問題都搞得掂，筆者就真係要寫個「服」字！

原圖：星島日報

https://std.stheadline.com/realtime/article/1849853/