新政府如何解決住屋難題，相信是市民特別關注的，尤其居住係劏房嘅基層。有議員批評香港過去25年來嘅房屋問題，最大失誤係土地開發不足，導致供應緊張，好多經濟發展活動難以達成，以致產業單一化，所以建議香港可以運用郊野公園等地，作前瞻性規劃以解決房屋問題。

事實上，發展郊野公園邊陲地帶，都唔係乜嘢新鮮事物，早喺梁振英時代已提出，並由房屋協會研究，只不過前特首林鄭月娥認為不可行而擱置；如今特區政府換屆之際，再有議員重提舊事再打郊野公園主意，相信必又引來一番爭議。

嗱！新班子是否有新思維及新作風，我哋暫時未敢肯定，之不過，風水佬就話呃你十年八年，新班子如果真做實事，相信好快見真章！特首李家超大早都承諾「優先處理房屋問題」，就任後將成立由司長級官員帶領嘅「公營房屋項目行動工作組」及「土地房屋供應統籌組」，務求縮減建屋程序、加快覓地效率。佢又掦言將於履新百日內公布「公屋提前上樓計劃」初步方案，確保「行動要有結果」！

林鄭嘅「長遠房策」之所以為人詬病，就係一味諮詢、研究，要言之，就係光說不練。難怪有論者指出。林鄭即然一早想為香港未來打造成一個超級玫瑰園，點解唔一開始掌特首呢個大位就開始籌劃，拖到落雨收柴先獻鴻圖偉略叫「前人種樹，後人乘涼」，實在令人質疑佢根本冇心為民解決「房事」！

嗱！房屋局局長何永賢表示，加入該局嘅決心係見到有基層居住環境差，盼工作能改善他們生活，改變基層命運及帶來幸福。她指該局嘅工作會「立即行動」，又指與其他局有一定默契，並指第一天工作將會聯絡建築業界，共同解決香港住屋問題，「願公屋溫暖萬家」。至於發展局局長甯漢豪表示，過去10年她先後出任地政總署工作，而未來將做好土地發展工作，達致「提質、提量、提效」，而發展過程會謹記「以民為本」。佢仲話政策出來，需要落實，並精簡程序，局之間加強協作。

各位，一個有效率嘅政府，「良政善治」無作講求實效，筆者特別把兩位候任女局長嘅話，不厭其詳引述出來，無非感到她們「心中有民」！而且有股使命：去民之患，如除腹心之疾！當然，最重要就係深明「為政貴在行」！一上任就要實幹不賣弄花巧，咁就唔會5年後又再廢噏「前人種樹，後人乘涼」啦！

原圖：星島日報

https://std.stheadline.com/daily/article/2333107/