周二晚（21日）元朗、屯門、天水圍大停電，就在社會人心惶惶之際，執法者再次挺身而出幫手！話說當晚停電停到連街燈、交通燈都熄滅，其中在天水圍天華路馮家圍路口，有消防車就被困喺車龍之中。就喺呢個時候，有3位熱心市民行出馬路指揮交通，最終成功幫消防車開路。原來，呢3位好市民都係休班警察！

事發時，現場街燈通通唔著，只有來往車輛嘅車頭車尾燈，以及消防車緊急燈「照明」，環境頗為混亂。從網上流傳嘅行車記錄儀片段，拍攝到其中兩位休班警指揮交通嘅情況。其中一名男子先行走出馬路，打手勢示意堵塞嘅車輛開走，隨後又有另一名男子加入幫手，令有關路口嘅堵塞好快舒緩。

據透露，三位休班警分別姓馮、姓林及姓周，都係駐守新界北機動部隊（PTU）。事發時，佢哋收工揸車途經該處，見到兩架消防車被困於車龍之中， 所以主動落車及指揮交通，令消防車可以駛出。

警察好嘢！前晚嘅大停電令市民無所適從，大西北交通混亂，好彩有你哋出手，幫助市民解困！抵讚！

原圖：車cam特警截圖

https://www.youtube.com/watch?v=qepyDPW-ahA