保安局局長鄧炳強早前出席活動，致辭時提及本港經濟過去兩年受新冠疫情影響，但近期疫情回落，市面已經開始回復正常，強調政府絕不鬆懈，會因應疫情變化而採取必要措施，令經濟回到上升軌道；佢又講到，現屆政府已修訂多項勞工法例，包括有關不合理不合法解僱嘅罰則、法定產假增至14個星期等，並指現屆政府會喺任期結束前繼續努力，取消強積金對沖嘅安排。

上面講咗咁多福利政策，如果係出自政務司司長、財政司司長，又或者係勞福局局長把口，都係非常正路嘅一件事。喺英殖政府遺留落嚟嘅官僚制度底下，香港官員素有「為官避事」嘅惡習，但鄧炳強身為保安局局長，即使不在其位，仍然關懷基層百姓，心繫社會經濟，實屬非常難得，亦可見佢有著鴻鵠之志，區區一局之長絕對唔會係佢仕途嘅終點。

鄧炳強於止暴制亂期間嶄露頭角，任職警務處處長期間運籌唯握，展現出非凡決斷力及領導能力，係為香港人平息黑暴嘅大功臣之一；佢高升至保安局局長後依然未曾停下腳步，為維護國家安全及香港社會而努力，其才能可以話係有目共睹，深受市民肯定。

候任特首李家超提出為三司增設副司長職位，目的係分擔司長工作，幫忙強化政府施政，並喺有需要嘅時候負責統籌同處理指定項目。

比起三司司長，相信行政長官肩上嘅擔子絕對係過之而無不及，既然三司都可以增設副司長，咁特首係咪都可以有一名「副特首」作為副手呢？假如香港真係有「副特首」，放眼當今官場，誰是最理想人選？相信大家心中都有一個明確答案！

原圖：大公報

http://www.takungpao.com.hk/231106/2021/0826/624609.html