美國又嚟喇！「612基金」多名信託人涉違國安法被捕，引嚟達在太平洋彼岸好得閒嘅美國加把口，其中美國國務院發言人普賴斯出嚟「強烈譴責」，話事件說明咗港府不斷咁壓制異己，削弱香港市民嘅權利同自由喎。美國一頂頂大帽子扣落嚟，但係完全唔睇案情，美國本土如果咁樣對待法律，真係情況堪憂呀。

「612人道支援基金」一鑊熟事件全城熱爆，警方國安處於10日、11日，先後以涉嫌干犯「串謀勾結外國勢力或者境外勢力危害國家安全」罪，拘捕許寶強、陳日君、吳靄儀及何韻詩等4名「612人道支援基金」信託人。有罪無罪，一切由法庭評說。

香港絕大多數市民都唔覺得自己冇咗言論自由同權利。反而美國張口就來，唔只美國國務院，白宮副發言人卡琳讓皮埃爾又話中國同埋香港當局唔好再針對陳日君等人，應該立即釋放佢哋，同埋盡快釋放嗰啲因為不公正被捕嘅人士，仲話言論自由對於香港嘅社會繁榮至關重要添。

民主霸權講嚟講去三幅被，乜嘢拘捕都話關言論自由事，唔講仲以為香港又變得水深火熱。實情係，2019年黑暴爆發，市民至今依然歷歷在目，都希望執法者盡力查清幕後黑手，還香港市民以至社會一個公道。但香港是中國的香港，香港發生嘅事，到底關美國乜嘢事？幾時輪到你出聲！

原圖：普賴斯Twitter、星島

https://twitter.com/StateDeptSpox/photo

https://image.stheadline.com/f/1500p0/0x0/100/none/0902e8d2d1f28c4bbc06691170c5fbdc/stheadline/ST/Kolnews/2020/10/06/080831_VCKTMxro.jpg