青春易逝，天涯飄零，喺時間面前，冇嘢係永恒，尤其政治嘅陰險狡詐，心術不正，輕易便化成虀粉！

筆者以上嘅感慨，係見到身為港同盟、與匯點合併創黨近28年，曾是泛民主派龍頭嘅民主黨，目前陷財困局面，營運資金據悉只能捱到年底，要四處「撲水」。

民主黨嘅衰落，有跡可尋。財困皆因黨內立法會議員已「清零」，區議員只剩7人，再加上需「泵水」予多名涉嫌違反《港區國安法》、正陷牢獄嘅黨友，導致該黨收入劇減，更需依賴賣黨產維生。有學者批評該黨缺乏民間授權，議政功能全無，人才凋零，全無政黨號召力，係時候「收皮」，冇謂獻世咯！

事實上，過去民主派也文也武，不但有黎智英嘅「大水喉」射住，連美國政客都視之為上賓，風頭一時威盡，喺立法會所佔議席僅次於民建聯。阿哥，有議席即係有影響力，籌款梗冇難度。之不過，時移世易，國安大法呢把削鐵如泥嘅尚方寶劍一祭出，反中亂港嘅泛民人士邊會有運行吖！

民主黨嘅自掘墳墓，應了「上帝要你滅亡，必先令你瘋狂」鐵律！觀乎民主黨，正是如此！「一國兩制」下，昔日恃外國勢力叫囂，公然與黎智英勾連，策劃暴亂欲制裁中港，視「一國」如無物。狂妄自大，又點可能有好下埸？

從歷史嘅角度看，愈是義正嚴辭呼喚「民主」、「自由」，卻沒有堅守使命為港人謀幸福，只為其黨謀福利，一個無「責任文化」嘅黨，要言之，即不是為了尋求並擴大市民共同利益，而係想「賣港求榮」！反中亂港至路人皆見，這樣的一個黨，到頭來反而成為一段荒謬絕倫嘅馬戲表演，樂在其中嘅係反中亂港嘅政客，而荼毒貽害唔少盲毛信徒！依家後悔都已經太遲了！

於今腐草無螢火 ，終古垂楊有暮鴉。民主黨走到今時今日，剩下一塊爛招牌，於夕陽西下，只能與腐草同化，四處「撲水」都冇乜作為了！一個歷史嘅終結，民主黨摺埋係唯一出路！

原圖：星島日報

https://std.stheadline.com/politics/article/1533769