特首林鄭月娥「夠鐘返屋企」，不競逐連任，坊間眾聲喧嘩，有覺得佢嘅選擇係「明智決定」；有認為佢抗疫無能，搞到死咁多人，既然係要負主體責任，冇得留低自然不過！有學者係面書發帖：某人說「家庭最重要」，意思可能是「自己的家庭最重要」，卻並不包括那些被拆散的家庭——因為那只是別人的家庭。
筆者覺得林鄭42年公務員生涯，位極人臣，做咗5年一任特首「功成身退」，從任何角度看，佢都係叻人！根據《基本法》規定，特首5年一任，可以連任一次，即總共10年，事實上，由董建華完成了第一屆和第二屆部分任期；其後嘅曾蔭權、梁振英、林鄭月娥，冇人做足10年。講真，以一女性而可攀上行政長官呢個高位，林鄭之後，是否仍有女性當此重任，筆者相信短期內不易「再有來者」！
林鄭任內，未得民心，那是肯定的，其民望近年都在低處徘徊，只得約百分之廿零，而根據歷史定律，得民心者得天下！不得民心者失天下！
呢，林鄭在任特首5年，留下唔少頗堪玩味嘅金句，其中一句係「拎特首嚟出氣係沒問題，特首係可以俾人鬧！」各位，呢句其實可以睇到林鄭高傲霸氣嘅一面，亦可以睇到佢都有少少胸襟！佢除咗硬梆梆的言論外，如「官到冇求膽自大」、「我係叫佢哋（官員）不准戴（口罩）戴咗都要除落嚟」；佢都有自嘲嘅一面，好似今年3月9日佢回應主持每日抗疫記者會時話：我相信大家都唔想成日見到我，早啲見唔到我，即係香港已經回復正常生活。
所以話，批評一個人，都不能以偏概全。嗱！早前美國政府因應《港區國安法》實施，2020年8月宣布制裁包括林鄭在內嘅11名中港官員，佢同年係訪問中表示，因為制裁嘅緣故，無法擁有銀行帳戶，港府要以現金方式向她支薪，佢亦將現金工資存放家中。又根據行會個人利益登記冊，佢與丈夫林兆波係香港冇持有物業。
有記者之前問林鄭，會否擔心生活有困難，林鄭僅稱「多謝關心」，並指有關事項屬私人問題，佢不會回應。筆者覺得記者朋友未免杞人憂天，好擔心唔擔心，擔心一個月入41萬港元嘅行政長官離任後會否有「生活困難」，唔通覺得佢真係唔知去邊到買廁紙？筆者只寄望林太，既然一年前已經選擇回歸家庭，講真，人生有幾多個42年？
選擇放下，最好乜公職都唔好再做，如此，才能真正活在當下！領略「細數落花因坐久，緩尋芳草得歸遲」嘅退休生活！祝福林太！
原圖：林鄭月娥FB、星島日報
https://www.facebook.com/carrielam.hksar/photos/1908027172710173
投票已截止，多謝支持
返回
