這陣子寫時事短評，愈寫愈不是味兒！確診人數日日5位數字，而死亡人數更令人驚心動魄，日日二百多人，而且以安老院長者佔多數！專家就日日出來講嘢，眾聲喧嘩，個個有一套，一時一樣，都唔知信邊個？

人嚇人，好易暈！筆者此刻都想向林鄭學習「勿看勿聽勿信」，疫情下，咁就可以活得自在啲，甚至學吓宋朝政治家、文學家王安石咁：細數落花因坐久，緩尋芳草得遲歸，你話幾寫意！

近排一打開報紙、或打開手機，影入眼簾嘅都係負面新聞，好似第5波疫情肆虐，殮房都逼爆，甚至醫院急診室都要堆滿屍，病人伴屍共眠！而棺木難求，想入土為安都成奢望等，有精神科醫生甚至引韓愈嘅《祭十二郎文》以抒懷：「嗚呼！汝病吾不知時，汝歿吾不知日，生不能相養於共居，歿不得撫汝以盡哀，斂不憑其棺……」總之，香港儼然成為「悲情城市」，令人不忍卒睹！

這位精神科醫生於是認同港人嘅抗疫疲勞已近臨界點，並有理由相信某程度嘅「精神海嘯」，亦已迫在眉睫，譬如有老婦喺快速檢測中得知係陽性便上吊身亡；有人喺港鐵車廂做出怪異行為；有退休70歲老翁畀三唔識七嘅人襲擊重傷，終不治逝世！要求有關當局應密切關注大眾嘅精神健康！

筆者對此有同感焉！這陣子，為了「稀釋」呢種悲觀情緒，筆者調整了閲讀心態，晚上吃過簡單嘅晚飯，沖過涼後，聽幾首輕音樂，閲讀一些名家散文，最近在看台灣散文家徐國能的《詩人不在，去抽菸了》，感覺特別好！譬如第一篇「飲食小記」寫廚房故事，便令我心境好平靜，甚至有種說不出的溫馨：窗外暮色低垂，我想在此刻，多少廚房燃亮了暈黃的燈；多少爐頭溫暖了疲倦的心。飛揚的麵粉與蕃茄肉醬熬出的香味，使我突然想起了遙遠的童年時光，原來廚房不只是一個烹調空間，而是維繫了對家的情感與記憶；平凡的人間煙火無可取代，正是因為幸福真正的滋味就在其中。

疫情期間，苛刻嘅禁足令冇咗夜晚堂食，搞到唔少食肆酒樓趁機唔開，有些更索性連日間都唔做堂食，認真冇癮！筆者早餐常幫襯嘅一間粥舖，生滾艇仔粥和及第粥係我至愛，可惜基於疫情持續嚴峻，改變了只做外賣，試過買回家吃，粥底變杰，完全不是那回事！想食靚粥，唯有自己煲！疫情下，多咗人在家煮食，正如徐國能所說「平凡的人間煙火無可取代」，筆者疫下苦中自樂，藉煮食和閲讀一些有溫度的散文調節身心，總算取得一點點心態平衡，個人冇咁躁鬱，唔使咁快睇精神科醫生，算是找到出路！

原圖：文匯報

https://www.wenweipo.com/a/202109/08/AP61385dbce4b08d3407d90e1f.html