《呂氏春秋》有所謂「識人六驗法」，有高人指，以「喜」來驗人嘅節制能力，睇吓佢會唔會失去理智；以「哀」去驗人會否悲觀失望，怨天尤人；以「樂」驗證其愛好，會否玩物喪志。至於「懼」係驗人能否勇於負責，而「苦」係驗人能否吃苦耐勞。這種「識人」和「驗法」，或失於籠統，不一定靠譜，筆者倒想對「懼」與「苦」略抒一己之見。

先說「懼」，早前發生嘅「童樂居」虐兒事件，目前警方一共就此案拘捕23人；案件現時總共涉及39名兒童，全部送院檢查。事件引起社會各界嘩然。有關嘅中期檢討報告亦指出已辭任嘅保護兒童會總幹事蔡蘇淑賢承認甚少到訪童樂居，亦從無翻看閉路電視片段。而風險管理專家僅觀看童樂居其中嘅912小時閉路電視片般，已找到55宗被界定為「紅色」級別，即被識別為虐待事件。可見「童樂居」已變「童虐居」！

好明顯，有關高層對樂童居嘅日常運作完全係放任自流，零監管，如此疏忽職守，唔出事就怪！正如有立法會議員指出，儘管保護兒童執行委員會已收到獨立檢討委員會首階段報告，並係日前向公眾作交代，但機構自己調查事件，成效令人懷疑，更何況勞福局局長或社署署長至今仍未作出詳細交代，唔通想側側膊，唔多覺？

喺呢單虐兒醜聞，筆者睇唔到勞福局局長和社署署長有何「懼」，只見其即使涉及呢單醜聞嘅言論都係顧左右而言他，不痛不癢！大哥，難道佢哋作為有關高官就一點責任都冇？佢哋同樣都係對童樂居零監管！事發後連一個公開道謙都冇！一點恥感都冇？正如有論者指出，呢單嘢如果發生係歐美任何一個國家，佢哋必定要引咎辭職！民意亦唔會容許佢哋繼續「好官我自為之」！筆者倒好疑惑：唔通港產高官都係「勇者不懼」或「官到無求膽自大」！之不過，日月昭昭，如此「無懼」，天理不容！筆者一直覺得香港六月應飛霜，七月應落雹！

至於「苦」，過去一年，港人「牛咁辛苦」都係徒然，皆因庸官防疫無能、抗疫冇方，通關無期，基層日子過得一年差過一年！依家虎年，香港諸事不順，即使虎躍香江都冇運行啦！唔少基層基本三餐都成問題，仲講乜鬼福虎送寶迎新春吖！好多基層都如涸轍之鮒，大家話有乜可以直接紓民解困嘅方法？

財爺波叔在其網誌中提到，第6輪「防疫抗疫基金」初步規模不少於200億港元，敲定細節會盡快公布。疫情持續嚴峻，基層收入大減甚至手停口停，唯一立竿見影，救基層市民於水深火熱，梗係直接派錢啦！港人防疫以來，已受盡苦難折磨！筆者但願港人「苦盡甘來」，政府派錢不少於一萬港元紓困，確係應有之義！派錢紓困，唔好又諸多耶穌！

原圖：星島日報

https://image.stheadline.com/f/1500p0/0x0/100/none/734032410c8b24ae379d6c1ac2888c89/