第24屆冬季奧運會日前於國家首都舉行開幕式，北京成為史上首個「雙奧之城」，是次盛事再一次由曾負責北京奧運會開幕式嘅著名大導演張藝謀所主理。地點不變、導演不變、家國情懷更加係從未變改。

筆者作為一名90後，自幼喺港英環境底下成長，從小所接受嘅教育，全由殖民地政府所灌輸，對於身份認同，對於家國觀念，極為薄弱甚至為零。尤記得2008年中國發生兩件大事，除咗8月舉行嘅京奧之外，就係此前5月嘅汶川大地震。

實話實說，筆者當初對於川震並無太大感情觸動，同情之心固然係有，卻只將其當作一起普通嘅災難新聞，並未意識到自己與四川同胞血濃於水，同為中國人一份子。每每諗返起當時少不更事嘅自己，總係羞愧難當。

直至京奧盛事，意識到中國強大，體內「中國魂」始真正覺醒，筆者同齡人之中不少亦是如此，或者有部份香港人天性就係咁市儈同現實，曾經對祖國愛理不理，直到祖國讓你高攀不起，先至會「忽然中國人」，醒起自己炎黃子孫嘅身份。

但當京奧熱潮一過，若干年後爆發「非法佔中」，再若干年後爆發「反修例暴亂」，呢一切與香港教育嘅失敗不無關係，要知道愛國需要持續培養，但國民教育遲遲未見，呢種臨時起意嘅「家國情懷」無以為繼，又如何令所有「忽然中國人」成為發自內心為國家為民族自豪嘅中國人？

是次中國冬奧僅僅係開幕式，就已經完爆剛於去年結束嘅日本東奧，相信有唔少香港年輕人會同當年目睹京奧嘅筆者一樣，「家國情懷」油然而生，但會如筆者般自行頓悟嘅人畢竟係少數，如何令所有「忽然中國人」成為真正中國人，就睇特區政府未來點樣落實國民教育了。

原圖：新華社

http://www.gov.cn/xinwen/2022-02/04/content_5671998.htm#34