《港區國安法》生效一年半了，司法「庇奸護黃」似有所收斂，但法律天平卻依然向反中亂港一方傾斜！點解咁講呢？大家都睇到，壹傳媒黎智英於去年6月4日不理警方反對，喺維園悼念六四事件31周年嘅晚會會場外現身而遭檢控，佢唔認罪。本月9號於區域法院被裁定一項煽惑他人參與未經批准集結罪成。

有關案件早幾日判刑，法官判正於赤柱監獄服刑嘅黎入獄13個月，惟有關刑期要與黎早前已判決嘅3宗非法集結案，共判囚20個月同期執行，換句話說，黎智英毋須另外加監，亦即「有判等於無判」。

嗱！對於一個慣犯兼拒絕認罪，「有判等於無判」，法律界人士都指咁判法，無疑「放生」佢，認為法官太仁慈；同時，根據以往法院判例，唔同控罪是否「同期執行」或「分期執行」，要視乎情況和嚴重性而定，黎涉及多宗非法集結案，雖然性質類似，但明顯唔係來自同一事件，而係來自多宗事件，唔同日期犯案；而且佢一犯再犯，視法律如無物，如果咁都延期同期執行，試問又點可以彰顯公義呢？

亦有評論指，這些年但凡涉及黎智英嘅案件總係出現古怪，譬如早前國安法案件指定法官，曾一度批准其保釋而引起軒然大波；日前呢單「有判等於無判」又再惹爭議。又如最新嘅「壹傳媒即時清盤」案，壹傳媒未停牌時，股價癲上癲落，由「仙股」炒上「蚊股」，市值翻咗好幾十倍而惹來造市疑雲，恐怕亦不了了之！可見黎智英確有保護傘！而且保護傘花樣多多，深不可測。是否一個如此不一樣嘅國安重犯，應送往內地審理，免生枝節亦更能見到公正、顯公義呢？

臨近立法會換屆選舉，日前警總又收到粉末恐嚇信！這絕非偶然！呢啲黑暴餘孽、反中亂港勢力始終唔會死心，睇吓咁多即使判囚嘅黑暴唔肯低頭誓不懺悔就知！加上洋奴漢奸藉外國勢力暗中推波助瀾，千祈咪睇小！事實上，佢哋一而再咁挑釁政府，當特首、保安局局長、警總等完全冇到，可謂老虎頭上釘虱乸！

對於呢啲恐嚇信件，特區政府切勿一味譴責，應該上天下地將呢啲反中亂港餘孽揪出來，繩之以法，判以有阻嚇性嘅刑罰！必要時更可「送中」，懲一儆百，香港才可歲月靜好，否則，國安大法下依然難維持長治久安！

原圖：星島日報

https://std.stheadline.com/daily/article/2304198/

https://std.stheadline.com/realtime/article/1708637