因新冠疫情而延後一年嘅立法會換屆選舉，即將於呢個月19號舉行，今次選舉意義非凡，除咗係國家出手完善選舉制度後，新增選舉委員會界別嘅第一場立法會選舉，更加係黑暴亂港後嘅第一場選戰，正正係香港人向外國勢力、黑暴份子說「不」嘅大好機會！身為一名自豪嘅中國香港人、作為14億炎黃子孫嘅一份子，又點可以錯過呢場世紀盛事？！

正因為今次選舉意義重大，黃色陣營早早吹風，意圖煽動群眾喺今次選舉投白票甚至係棄權，想要杯葛選舉落政府面咁話，誓要將「攬炒香港」嘅卑劣意圖貫徹到底！其中潛逃海外嘅前民主黨立法會議員許智峯正係其中表表者，正喺國外風流快活嘅佢仍然非常「關心」香港，早前更於社交平台發帖呼籲投白票，不過就過咗在港「手足」一戙，有3條友仔傻更更咁轉載有關帖文，日前（ 9日）被廉政公署以涉嫌煽惑他人在立法會投白票拘捕。

特首早前就話，投票率嘅高低並不代表什麼。當然啦，對港府某啲高官嚟講可能真係冇乜所謂，但請各位香港人記得，兩年前2019年區議會選舉時，當香港警察夙夜匪懈與理大暴徒周旋嘅時候，因為香港大多數人選擇沉默，致黃黑勢力有可乘之機奪下區議會，令執法者失望。兩年後嘅立法會選舉，唔通大家唔想狠狠咁剝黃友棚牙，還執法者一個公道？所以呢一票，投嘅係香港警察！

原圖：星島日報、頭條日報

https://std.stheadline.com/realtime/article/1275416/

https://std.stheadline.com/realtime/article/1529980/

https://std.stheadline.com/realtime/article/1635697/

https://hd.stheadline.com/news/realtime/hk/2153487/