國安法實施後，唔少播獨及參與暴亂嘅暴徒，已如喪家之犬，夾着尾巴走夾唔抖。嗱，不久前中國外交部發表《美國干預香港事務清單》，被點名達8次最多嘅羅冠聰，呢條友喺國安法生效前棄保離開香港，更厚顏話離開係「痛苦決定」，鼓勵手足「繼續對抗」，畀網民狠插佢完美演繹乜嘢係「叫人衝，自己鬆」。

講開呢啲用把口抗爭嘅窩囊廢，又點可以少得民主黨老鴿李永達？佢鬼祟遠走英國後，佢老婆、屯門區議會前主席陳樹英又跟埋飛去英國同佢會合，「嫁雞隨雞，嫁狗隨狗」。

近排除咗啲黃人遠走高飛外，香港確係乍現移民潮。之不過，遠走高飛去他鄉尋覓新生活，正如有論者話齋，人各有志。香港喺不同時段，如六七暴動、九七回歸等都出現過「移民潮」，其後因「搵唔到食」，亦有唔少人回流返來。香港係一個自由城市，有人出有人入好平常。筆者亦有唔少朋友移民去了，佢哋足跡遍布英國、澳洲、加拿大、台灣、新加坡等；理由各有不同，例如有些是「老來從子」，逼不得已跟住移民。

呢，香港啲醫護人員近年亦流失唔少，以至公院鬧醫護荒。筆者留意到公共醫療醫生協會前會長馬仲儀，佢上月已離開聯合醫院，並移民英國繼續行醫。據悉佢離開係因為醫護人員可能要宣誓、不忿「政治環境氣壓太低」，以及政府修改《醫生註冊條例》等有關。

理由不值一哂

馬仲儀嘅所謂「政治環境氣壓太低」，根本不值一哂！正如明眼人一嘢就睇穿，佢政治凌駕專業、仇警仇共上腦，佢個工會黃到出汁，根本係「身有屎」，惶惶不可終日。黑暴期間，不少黃黑醫護人員唔係以病人福祉為首位，而係動輒發起罷工，甚且聲援無中生有嘅「爆眼女」，更加以罷工威脅封關。馬仲儀接受訪問時，種種出位言行，已超出醫護人員嘅專業操守。筆者只能說，醫管局一眾高層平時管理不善，過度放縱有以致之！

當然，馬仲儀棄香港醫生之高薪厚酬，人工少一大截都肯為英國佬服務，若然唔係「戀殖」情結延續，亦係佢個人自由選擇。筆者相信好多港人對佢投奔英國拍爛手掌：馬仲儀，好行夾唔送！去到英國呢個「政治環境氣壓」完全唔同嘅國度，妳估妳仲可以繼續打橫行搞搞震咩？人離鄉賤，喺香港做醫生就威，去到英國？筆者相信佢好快會感到「鹹蛋煲湯」。即係乜吖？「心都實」咯！千祈咪以「海外醫生」身份，又想申請回流香港搵食啊！

原圖：星島日報

https://std.stheadline.com/realtime/article/1775907/