本屆政府執政任期所餘無幾，皆因明年新一任特首將於3月選舉產生。喺國安大法和落實愛國者治港下，早前官媒都話「管治好香港絕非易事。沒有點真本領是不行的」。確實，係中央強政勵治下，唔好話做行政長官，即使一眾問責高官，恐怕阿爺都唔再容許一個二個淪為「支薪嘅廢物」！

呢，作為高官，最重要就係要有擔當，要言之，平常之時，恪盡職守；非常之時，甘於奉權。林鄭本屆任期完畢，依筆者看應該「功成身退」，佢一直以來都覺得自己為香港犠牲好多，未能「相夫教子」享天倫之樂而「好委屈」，之不過，佢忘記自己高薪厚酬，位高權重，比起英美政要人工都高！大家諗深一層，佢在任究竟為香港人做咗乜？

事實上，好多嘢都係要留待下一任政府去完成。

中央破格提拔嘅政務司司長李家超和保安局局長鄧炳強，兩人正積極推動23條立法，眾望所歸，必然留低，應該冇懸念！財政司司長陳茂波任內亦受肯定，佢不久前發表香港營商報告，特別用好多亮麗嘅數據，強調香港營商環境無得頂，具備「優勢獨特、機遇無限」。財爺引述不少數字，證明《港區國安法》立法後本港金融狀況良好，譬如港元市場錄得資金淨流入；銀行體系保持穩健，截至6月底，銀行體系總存款額逾15萬億元；外匯儲備增加19.5至3萬7千億元等。仲有，推行消費券即使引來小混亂，佢都積極改善，又落區同市民多溝通，最近對壹傳媒頻頻出手⋯⋯種種跡象，看出佢不但想爭取連任，甚至更上一層樓！

其實，港人唔介意邊個做特首，最緊要有能者居之！

本屆政府充斥廢官，防疫抗疫都搞到一塌糊塗，講真，由統籌疫苗注射到谷針，筆者都見到公務員事務局局長聶德權嘅身影，但部份高官出現時就係廢噏幾句！至於其他——唉！不提也罷，一提就令人把鬼火，大家可以睇下黑暴期間，檢控嘆慢板，到底係咩原因？負責嘅官員唔該好好檢討。

至於好似鄭久慧指拆國旗拆到升官一事，就更加係眾望所歸，冇得留低喇！仲畀呢亭人做支薪廢物，真係六月飛霜、七月落雹吖！

筆者期待新一屆政府，真係選到一班愛國愛港，而且真正為港人謀福祉嘅好官！

原圖：星島日報

https://std.stheadline.com/realtime/article/1325369/