金風送爽，早幾日特區政府舉辦國家《十四五規劃綱要》宣講會，係政府總部舉行，京港政要共17人站於台上，重量級嘉賓雲集，內容涵蓋多個重要範疇；要言之，今次宣講會令到廣大市民認識到國家最新規劃嘅重要環節，並了解香港特區可以通過自身優勢，支持和配合國家發展，融入國家發展大局。

各位，回歸咁多年來，反中亂港集團不知好歹，好似支聯會一味叫囂「結束一黨專政」，或者好似法輪功廢噏甚麼「天滅中共」，不知天高地厚嘅黃政棍為咗吸睛，最鍾意嗌「打倒共產黨」，真係蚍蜉撼樹，正是「有幾個蒼蠅碰壁。嗡嗡叫，幾聲淒厲，幾聲抽泣」。阿哥，唔係咁都睇唔到啩？中國共產黨之所以係中國現代化嘅決定性力量，最關鍵嘅理由，就係佢帶領中國人民找到了一條正確嘅發展道路，即係「中國特色社會主義」！佢不斷為呢個民族提供一代又一代嘅不計個人榮辱、為咗大眾幸福勇於任事嘅先進分子！

中華民族偉大復興，的確並不是敲鑼打鼓就能實現，而係先進嘅共產黨人，一批批為老百姓幹實事，贏得人民信任，你話有可能畀一班無聊政客亂嗌幾聲口號就倒台嗎？中聯辧主任駱惠寧提到香港要把握機會融入國家「十四五」發展，從政治、經濟、文化等全面融入國家發展大局。駱主任表示：全球發展的最大機遇在中國，香港發展的最大機遇在內地，香港一定要牢牢地抓緊。「十四五」規劃，可以話明確給予香港發展新定位，並給予更多政策支持。

隨着去年落實《港區國安法》，反中亂港集團聞到燶味，紛紛解散求自保，再加上今年中央完善香港選舉制度，落實愛國者治港，行政立法互相配合，阿哥，係咁嘅大好形勢下，特區政府如果沒有辦法提升管治效能，再令香港社會嘅引擎空轉，咁，只能再次凸顯特區政府真係冇料到！

蘇州過後無艇搭

筆者只係想講，阿爺恨鐵不成鋼，一再推出惠港政策，香港正是久旱逢甘霖，再不抓緊時間及機遇，就真係「蘇州過後無艇搭」咯！如何「聚精會神搞建設，一心一意謀發展」，就睇特區政府如何利用「一國兩制」優勢，為香港再創奇蹟！

林鄭話「深刻體會香港的發展必須與國家緊密相連」，呢句話同「阿媽係女人」基本上冇乜分別，問題係過去兩年，香港社會嚴重撕裂，如何挽回民心，令港人支持政府，則政府高官不能只躲在冷氣房寫寫網誌，要多落區深入基層、了解民生，換句話說，即係多做實事！共產黨之所以成功，無非「從人民中來，到人民中去」！阿哥，習主席都成日到各地考察做民調啦！香港巿民多怨氣，就係太多高官一味廢噏無謂！大佬吖，民生多艱，有時負責福利嘅高官，點解唔可以落貧民區派吓叉燒飯？

「十四五」規劃提出對香港鞏固提升競爭優勢，新增4個中心，包括國際創新科技中心、區域知識產權貿易中心等，令人想起每當香港「不行了」，好似2003年沙士時，阿爺開放「自由行」，為香港不振嘅經濟輸血，今趟駱主任又勗勉香港特區政府要「善用國家政策支持，努力開創香港發展新未來⋯⋯現在需要香港社會進一步動起來」，恨港人爭氣，再寫下不朽香江名句；恨特區政府振作，再創一番豐功偉績之心彰彰明甚！

筆者認為，香港要融入大灣區，為國家發展作出貢獻，首先，各單位不容怠政成日等運到，唔好凡事議而不決，決而不行，尤其係民生福祉上，譬如多覓地建公屋，為基層市民「房事」着想，開講都有話「房事暢通，生活輕鬆」，民怨自然大減！

此外，一眾問責高官要自強不息！真正做到迎難而上！發掘真正為港為國嘅各方面人材，「我勸天公重抖擻，不拘一格降人才」！如此用人，才能真正落實國家「十四五」規劃。

再講吖，依家最重要係爭取早日粵港澳通關，才能真正刺激消費，帶旺經濟！

原圖：港台YouTube(國家"十四五"規劃講座)截圖，素材網

https://www.youtube.com/watch?v=jJODI2BX-do