阿富汗短期內相信難得平靜，塔利班早前閃電攻陷首都喀布爾，兵不血刃就佔領咗總統府，看來美國投下天文數字嘅金錢、人力資源培訓阿富汗士兵是打水漂了！阿富汗兵不堪一擊，阿茂都知佢哋根本無心戀棧保家衛國，內心成日想「出走」，二來軍隊貪污腐化，點會有所長進？

阿富汗塔利班強勢復國，美國面目無光，依然未肯認衰，重申撤軍冇錯，強調「國家建設」從來不是美軍係阿富汗嘅目標。中國外交部發言人華春瑩串爆拜登，形容佢講嘅係實話，因為無論係伊垃克、敘利亞，還是阿富汗，可以見到美軍所到之處，留下嘅都係動盪分裂、家破人亡！

美國打着「人道主義」說來諷刺

旨哉斯言！世界之所以長期不安，尤其中東地區，平民百姓都活在生靈塗炭中，死傷枕藉！美國一直自詡為「山巔之城」，支持「天賦人權」，肩負「天賦使命」，咁多年來，一直打着「人道主義」嘅旗號對外動武，卻搞到世界大亂，說來諷刺！

呢，據不完全統計，從1945年第二次世界大戰結束到2001年，世界上153個地區發生了248次武裝衝突，其中美國發起嘅就有201場，約佔81%。阿哥，你話如果冇咗美國係度搞搞震，世上有幾多地方唔會兵荒馬亂？美國根本係人道主義災難嘅締造者！

講番阿富汗呢筆，早喺2001年10月，美軍出兵阿富汗，係打擊阿蓋達組織和塔利班嘅同時，均造成大量平民傷亡。由於缺乏權威嘅統計數據，有關嘅傷亡數據冇定論。

一般認為，自美軍2001年10月進入阿富汗以來，當地已有3萬多名平民被美國打死、炸死，受傷人數超逾6萬，約1100萬人淪為難民！

美國佬長期濫殺無辜平民，係咪應受到天譴？

特朗普豪言「重來」並非不可能

拜登執政以來，阿富汗一役令佢面目無光，難怪民望一直在下滑，國會民主黨從自由派到溫和派以及共和黨議員，都認為拜登撤進程亳無章法，陷阿富汗人民於不利，也讓美國蒙羞。

拜登再死撐自己係阿富汗撤軍政策正確，恐怕亦冇力挽回失勢嘅民望！佢又愛面子死撐，更加把自己無能來個乾坤大轉移，指延長戰爭嘅得益只會係中國和俄羅斯！一個人衰到貼地就會手指指，以為有face，信焉！

耄耋之年，時勢造就佢奪得美國總統寶座，可惜留係美國總統歷屆政績上，只得兩字：「不堪」！看來特朗普豪言佢會「重來」，並非不可能！依家見到拜登嘅「不堪」，必定笑到嘴歪！大家切勿搞錯，以為特朗普打咗疫苗而面癱吖！

原圖：無綫新聞截圖、Joe Biden Facebook圖片

https://www.facebook.com/joebiden/photos/10157602667521104