樹倒猢猻散，牆倒眾人推。之不過，創立於1973年、至今已有48年歷史嘅香港教育專業人員協會，有會員近10萬，資金雄厚，淨係4個物業料值3、4億港元，照道理冇理由「解散」得咁急，樹未倒、牆屹立，忽然話「研判形勢後」，理事會一致通過解散，監事會一致支持決議！阿哥，仲有冇兒戲啲吖？趕住投胎咩？

嗱！教協會長日前都承認有關決定「做得突然」，計筆者話係「決定得好肉酸」，語云「人窮則詐」，即係人到走投無路時會開始欺騙，好似啲雀仔咁，無處可飛時會亂啄！依家教協一班骨幹如會長馮偉華、副會長葉建源之流，成日撐失德黃師、荼毒香港教育界，依家被內地官媒狙擊為「毒瘤」，必須剷除！已嚇到失禁、驚到鼻哥窿冇肉！更加冇晒章法！

呢嘞！凡事都應有規有矩，冇規矩難以成方圓，反對派如教協一向強調「民主」，又話為「民主」奮鬥，之但係為求自保，「民主」立刻過晒鐘、玩失蹤！

喂！阿哥！根據教協會章第二十條，解散必須有全體及格會員三分二或以上，以秘密投票表示同意，方可解散。教協會員有啲就話「唔知道」、有啲就話覺得好政治化、有啲話迫於無奈都冇辦法。顯然教協會員都唔知自己有乜權利，而一眾理事骨幹見勢頭唔對路，身有屎，求撇清關係，以解散自救、跳船自保！完全當近10萬會員冇到，冇召開會員大會就解散，堪稱冇規冇矩，真係枉為人師，試問一眾會員又情何以堪？

教協反中亂港劣迹一大堆，好似2012政府計劃喺學校推動德育及國民教育科，教協會聯同「學民思潮」發起反國教遊行；2014年曾宣傳違法佔領行動，其後更為參加非法集會嘅老師及學生資助車費；2019年，教協喺反對修訂《逃犯條例》風波期間號召業界罷課等。做咗咁多衰嘢，終於令阿爺忍無可忍話必須剷除呢顆毒瘤！教協先知驚想補鑊，一時話「今後將聚焦教育專業、全力做好工會嘅本業」；一時又扮「愛國者聯盟」，話「成立中國歷史文化工作組」等。依家先「放下屠刀」就想成佛？

嗱！教協諸骨幹自己低B，都咪當人傻豬至得㗎！時辰到，點到你班冇膽鬼唔找數？官媒日前發文，語氣更凌厲，直斥佢哋係育人無方、害人在行；教協所作所為令教育蒙羞，已成為香港社會人人喊打嘅過街老鼠。文章用詞辛辣，強調教協解散不等於一筆勾銷，嚴斥其落得分崩離析，可謂咎由自取。

國安除患，妄想甩難！大家拭目以待。

原圖：星島日報

https://std.stheadline.com/realtime/article/1662392