疫情持續年半，至今粵港澳三地通關仍雲深不知處，咁搞法，重創嘅旅遊業想復甦都難！加上黑暴以來，社會撕裂，經濟民生百廢待興！唯一堪可告慰嘅，就係港區國安大法實施後，加上中央落實「愛國者治港」大方向，國安重犯不是在監獄洗廁所，就係還押候審，反中亂港者至此完全「冇戲」，唔知死嘅一小撮黃人政治小學雞，亦已惡唔出樣，更多係如洩了氣的皮球，已彈不起了。

呢，一項調查話畀大家知，大眾市民最熱門嘅搜尋數據，分別係交通、天氣、經濟、醫療衛生和人口，要言之，亦即係民生攸關嘅「衣食住行」。有論者就話喇：唉！喧囂多時嘅政治，竟然排不上市民最關注話題前5位，打破咗好多人嘅認知和想像，有醍醐灌頂之效。阿哥，若然有人仍然執迷不悟，一味要玩嘢搞風搞雨，肯定捉錯用神，落得如荃灣前區議員岑敖暉係獄中嘅感慨：佢係面書懷疑自己係唔係「做咗condom」，即係畀民主派同路人用完即棄喎！坐監原來令人生多反思而非精彩，依家才覺「今是而昨非」，可惜眼前冇路想回頭，已經太遲了。

黃區議員聞風先遁

講開又講，隨着宣誓條例草案通過，全港400多名區議員宣誓在即，消息透露，港府早列出「負面清單」，包括支援並參與民主派初選嘅區議員、借出議員辦事處作票站、簽署「墨落無悔」抗爭派聲明、聯署要求中止香港獨立關稅區、在區議會辦事處展示「光時」口號等。呢班黃衰議員誓被DQ無得留低，政圈傳出政府將追討被褫奪議席者逾百萬港元薪津後，觸發新一波辭職潮。有消息指約230名區議員不符宣誓要求，將被DQ，難怪咁多人聞風先遁！

消息指，政府會係本月中下旬向現任區議員發出信函。合乎宣誓資格嘅區議員將會收到宣誓嘅地點通知，反之，收唔到邀請書，即係被DQ。仲有更辣嘅消息，就係倘若政府向區議員發出不符合宣誓要求、不獲邀請宣誓嘅信函後，區議員才選擇辭職，仍會被追討逾百萬元薪津！

政府自當落實監察

要言之，如果區議員係政府去信前已辭職，就不會被追討薪津。一眾攬炒派黃區議員，不務正業，反中亂港，唔想偷雞唔到蝕把米，唔使人教都識走夾唔抖買個保險吧！當然，政府喺宣誓後自當落實監察，睇緊啲，否則宣誓效忠當食生菜，淪為一紙空文，又係盞嘥氣！

重整區議會，撥亂反正，讓民生經濟成為主旋律，係香港歲月回復靜好嘅第一步！

原圖：星島日報

https://std.stheadline.com/daily/article/2320124/