早幾日，筆者曾撰文指7.1回歸24周年，亦係中國共產黨建黨100周年，有人覺得自從《港區國安法》係去年6月30日生效之後，加上反中亂港走在最前線嘅黎智英已忙於日日洗廁所，而壹傳媒毒果報亦油盡燈枯，死翹翹了！蛇無頭而不行，香港整個政治環境，大抵已經撥亂反正！然而，正值7.1之際，難保沒有死心不息嘅搞事分子，趁機「贈慶」！果不其然，當真是明劍易擋，暗箭難防！不！係「暗刀難防」！

中年孤狼係7.1回歸紀念日刺警後自戕死亡嘅案件，不但震驚全城，更令吾人體會黑暴一直蠢蠢欲動，香港依然危機處處。消息指，「刺警案」疑兇事前經過策劃，不但寫下遺書存放於隨身嘅USB記憶手指內，還揚言「殺警後自殺」。

「孤狼式」恐襲之所以可怕，皆因兇徒平日表面看似平常，之但係收收埋埋，外人好難察覺其「想點」及真實一面，呢啲易受他人或自我激發而產生極端思想嘅「孤狼」極端行為，外國便經常出現。大家上網一查「孤狼恐怖主義」大把呢類例子，外國啲孤狼通常持槍行兇，殺傷力更驚人！

疑被毒媒洗腦

今趟刺警案係一名50歲未婚中年漢，任職一間飲品廠，平時亦不論政；警方喺佢寓所檢獲大量黑暴文宣，疑被毒媒洗腦。一日一毒果，理智就冇咗！猶幸毒果已變「蘋果汁（執）」，否則仲係咁放毒，都唔知再荼毒幾多人！正如保安局局長鄧炳強把呢單刺警案定性為「孤狼式本土主義恐怖襲擊」，強調過去有人不停鼓吹或美化暴力、煽動仇恨導致今次不幸事件發生，呢啲背後嘅推手都係滿手鮮血！佢強調會盡力將有關人士悉數「揪出送往監獄」！筆者都希望對待這類孤狼式恐襲，一定不可手輭！「恐襲法例」有必要修正從嚴，以遏止呢類事件重演！

今次事件，令人睇到黑暴只係由地面轉向地下發展，有關當局必須更小心防範。依家網上有人對兇徒自戕歌功頌徳，甚至稱之為「烈士」、「英雄」，有人更持白花到銅鑼灣現場悼念！若然政府已把刺警案定性恐襲，悼念暴徒或違國安法第27條，即宣揚恐怖主義、煽動實施恐怖活動嘅罪行，相關人士切勿以身試法。

事實係黑暴期間，警方拘捕逾萬人，當中只有2600多人被檢控。換句話講。即係仍有好多暴徒仍然逍遙法外，有議員問得好：呢啲暴徒會洗心革面嗎？呢大批避過刑責嘅人仍潛伏喺社會，難保佢哋等待緊作亂、發難嘅機會？社會上一直有聲音指律政司司長檢控太慢，失去咗儆惡嘅效用！筆者唔相信「樹大自直」，要防止黑暴死灰復燃，執法與檢控要同步！否則「警察捉人，律政司放人」，香港歲月難有真正安穏靜好！

原圖：頭條日報

https://hd.stheadline.com/news/realtime/hk/2119635/

https://hd.stheadline.com/news/realtime/hk/2119857/