被形容為「香港顏色革命大本營」嘅壹傳媒徹底執笠！真係善有善報，惡有惡報，時辰一到，統統要報！黎智英忠心耿耿要「為美國而戰」，誰不知今趟一注押錯晒，輸到壹條毛都冇剩！

呢，黎智英嗰位有美國特務背景嘅洋助手Mark Simon雖然醒水一早潛逃，卻越洋放話，指蘋果已彈盡糧絕，不日內就要停刊！阿哥，講到明都嫌嘥氣喇，即係話美國主子唔會再泵水打救佢，加上警方國安處又突然採取行動，拘捕撰寫社論嘅一名主筆，立刻嚇到毒果報嘅上下老幼，為求自保，仲唔提前自我了斷咩！

川竭而谷虛，丘夷而淵塞，唇竭而齒寒。這幾句是壹傳媒集團嘅寫照，樹倒猢猻散，整個集團全面熄機，樂得死翹翹！漢奸黎窮途末路，應了「人無善志，雖勇必傷」這句古老說話！

別存幻想

《壹週刊》社長黃麗裳係面書貼文，指壹仔由2018年賣盤不成後，從紙媒轉型到網媒，惟至今未能扭虧為盈。佢透露自己已做好撤退的事，並拋下「對於有同事仍存一絲希望，我只有狠狠的劈頭一句：別存幻想！」還是女社長比較率直務實，眼見壹淫媒前有千仞懸崖，後有萬條鱷魚潭，若然仍儍戇戇高呼「為迎接黎明奮戰」！這不是精神有問題都肯定腦袋嚴重灌水！另一位毒果報副社長陳沛敏亦劈炮並辭去5間公司董事。

大鑊臨頭各自飛！呢個時候，毒果報社長人稱「沙膽虹」嘅張劍虹都縮沙，為求保釋願同毒果報割席，唔再「困乏我多情」多情扮「君子挺拔，守節如竹」咯！而毒果報新聞平台總監張志偉亦證實劈炮！仲有嗰位一身罪「葉」嘅「一堅」，漢奸黎辭任董事會主席兼公司執董時，就由佢係2020年12月頂上，葉一堅貴為董事會主席，呢位「堅哥」係台灣都被台蘋員工喊打，事關台蘋變成蘋果汁（執），至今仍然傳出欠薪及遣散費未有着落，而呢位「堅哥」就變縮頭烏龜，至今恍似人間蒸發，聲沉影寂，連毒果報執笠版都唔見佢出來廢噏幾句，唔通真係「堅」到變吸風飲露嘅神仙，逍遙遊於太虛，獨與天地往來！為甩身，難怪有人指佢或早改名「葉枯萎」！仲堅條毛咩！

毒果報死翹翹，留下嘅唔係乜嘢「不畏強權」或「歷史見證」，而係大堆「蘇州屎」，嗱，譬如員工嘅薪金、代通知金、遣散費，若毒果若無力支付，最終可能又係破欠基金，即納稅人埋單！仲有吖，以預繳方式付費嘅訂戶，除咗被通知「即日停止自動續訂」，至於餘額點退回又冇交代。阿哥，咁算唔算「一日一蘋果，就咁呃咗我」？各位，乜嘢叫生前累朋友，死後害街坊？依家有辦你睇啦！

原圖：星島日報圖片、Pixabay素材網

https://image.stheadline.com/f/1500p0/0x0/100/none/4a6ec6413a880861791202d126fb3401/stheadline/news_res/2021/05/27/468359/i_src_028684773.jpg