前香港眾志秘書長黃之鋒向友人哀嘆，大家日後「再見」之時，佢可能已經係30多歲嘅中年人。古語有云：三十而立，又不必太傷感！何況根據勞福局局長羅致光嘅說法，依家啲人活到百二歲不是夢，六十歲亦不過中年啫！

黃之鋒總算有自知之明，因涉及去年民主派35+初選而被控觸犯《港區國安法》案，下月開庭提訊。唔通佢已打定輸數，預咗自己喺監倉要踎多陣？依家言之尚早，觸犯國安法，最重刑罰係終身監禁，是否坐多十碌八碌，都好難預料，有幸出來之時係三十而立或四十不惑，都真係天曉得！

黃之鋒入獄前曾寄語：知道好難捱，但撐住呀！唔知佢係寄語花様年華嘅周庭仰或以古稀之齡「勇闖人生巔峰」嘅黎智英！其實，喺香港踎監，大家睇吓報道，都知道不至於「好難捱」，起碼生活有規律，早、午、晚及消夜四餐，講真，唔少基層嘅饍食都未必有咁講究及食足四餐！至於話坐監好熱，阿哥，廿多萬基層住劏房，空間分分鐘仲細過監倉，你估佢哋就唔覺得燠熱難熬咩？坐監並非渡假，咪咁多要求喇！

有媒體邀請術數師為黃之鋒批面相、占牛年運程，指佢喺29歲後消失於政壇，又話佢幾咁出位都好，亦難以出頭。師傅感嘆佢嘅命格不宜從政，政治生涯只得10年，就好似燃燒嘅火柴咁短暫，實在可憐咁話。

至於黃之鋒嘅面相，發現佢下顎唔靚，形容係三尖八角，有呢種面相嘅人，通常缺乏話語權，話唔到事，晚年生活更可能過得悽慘。

嗱！筆者對術數師傅所言，都唔會入心，反正茶餘飯後，以資笑談無妨。不過，想當年，佢登上《時代》雜誌亞洲版做封面，標題係「抗爭的臉孔」（The Face of Protest)。封面上嘅黃之鋒穿上「學生運動無畏無懼」字樣嘅上衣，都真係「威到盡」！相信黃之鋒就係畀美國佬呢啲虛譽吹捧害死！同老漢奸黎智英一樣，以為「為美國而戰」就可以肆無忌憚，胡作非為，結果就變成今日嘅困阨命運！

網民就話：政府對佢真好，養佢咁多年。咁又係喎！早排新聞都話佢父母一早賣樓兼移民！難怪少見有親友探佢監！

又有網民提出對年輕人嘅忠告：這條路如同過河卒，不能回頭。年青人應引以為鑒，不可以為這些人好威！

正是如此，身後有餘忘縮手，眼前無路想回頭！一切已經太遲了！嫩漢奸與老漢奸監中放風時若相逢，未知會否相逢一笑仰或黯然無語？

原圖：Envato Elements素材網、星島日報

https://std.stheadline.com/realtime/article/1148639