明是狗熊，如何會變英雄？明是舢舨，又點充當炮艇？

充不成，盞笑死人冇命賠！筆者講緊係走佬政棍、前民主黨立法會議員許智峯，佢涉嫌干犯包括刑毀在內嘅N宗罪被警方通緝。數月前佢千方百計逃去丹麥，不久又逃去英國，日前又話流亡去咗澳洲。口痕友就話，如果連澳洲都唔掂，下一站恐怕係美國嘅賓州！

有論者就講得好，條友又再走佬，佢去邊根本冇人會太大關注，問題係佢仲要廢噏，話「流亡澳洲嘅香港政治領袖較少」，豪言「哪裡要人，就去哪裡」。阿哥，明明係逃犯，仲扮英雄，又話「內心十分掙扎」，目前冇申請政治庇護嘅想法，除非日後別無選擇！堂堂一個大男人，唔敢面對刑責而千方百計攜一家人逃亡，幾個月內要攜老扶幼一再流離失所，「內心掙扎」又有冇覺得自己不是東西？

許智峯根本係窩囊廢一名！同逃亡英國嘅前香港眾志羅冠聰一擔擔，天生懦夫扮英雄，一味發嘴炮，又話「人在海外，互相扶持，總有能為香港付出的角色崗位」，人都挾着尾巴逃亡，仲廢噏乜嘢「向政權纏鬥」、「打國際戰線」。許智峯又揚言「考慮了國際形勢，應將國際游說及協助流亡港人的組織工作擴大至各大洲」！

兄弟爬山變田雞過河？

一個逃犯，不過係「政治棋子」，搖尾乞憐央人收留，逃亡海外靠把口「唱衰中港」又有幾叻吖！「自己鬆，叫人衝」！講好嘅齊上齊落，核爆都唔分開㗎？連喺香港踎幾年監都咁驚青，仲講乜「革命」吖？兄弟爬山不是已變成田雞過河嗎？

最好笑就係高佬林卓廷曾以名詩「我自橫刀向天笑，去留肝膽兩崑崙」談許智峯，展示豪情壯志，可惜法庭之上，但求保釋大家都有目共睹，47個攬炒派人士，退黨嘅退黨、割席嘅割席，案未審罪未判，個個已經掛住我妻我兒我女，馬尿流滿臉，哭得悽涼，好似陰陽永隔。阿哥，咁嘅quali質素，學乜人講「革命」吖？大人大姐，為保釋啫，一夜之間將香港變成「哭泣之城」（屈穎妍妙喻），真係成何體統？

國安大法祭出未夠一年，一眾攬炒派全部現形！全係馬尾穿豆腐，提不起來！

不要再廢噏甚麼「打國際戰線」了！若可以保釋回家，攬住我妻我女我子嘅，一起打吓電玩War Game算吧！

原圖：羅冠聰Nathan Law Facebook

https://www.facebook.com/NathanLawKC/photos/2494259374058714