本港2020至21財政年度赤字破紀錄達2576億元，未來5年好大機會入不敷支再見紅，政府開源節流大費周章，皆因香港乃開放型經濟體，稅基向來狹窄，政府倚重嘅印花稅和土地收益至為明顯；如今政府抗疫無能，鬆弛無道，至經濟一池死水，政府係民生多艱下，政府卻心中無民，唔係用盡善法為民紓困，諗吓如何激活經濟以暢旺市道，反而推一貧如洗嘅失業市民借錢，更磨刀霍霍向中層！

事實上，香港啲中層向來只係表面風光，政府好景時，「派糖」佢哋最少，公屋冇資格申請，居屋又因資產「尷尬」無條件，焗住租貴樓，有幸有「父幹」幫交首期嘅，供樓都供到索氣，平時都要慳住洗！依家財赤，無能政府竟第一時間諗起向佢哋開刀，仲唔係涼薄冷血！正如有學者話齋，政府係經濟差時應救濟市民，若再設新稅種或加稅，市民會質疑到底係「攞景定贈興」？

心中無民，政府點會明白安民之道在於察民疾苦吖？市民過去一整年，面對政府抗疫無能，市面百業蕭條，至少25萬人丟飯碗。係咁嘅困境下，相信絕大部分市民都希望政府於新一份財政預算案，能化身及時雨，每人派1000元江湖救急！可惜庸官諸多藉口，一味話要「睇餸食飯」，懶理非常時期市民生活於水深火熱中！

更令人不惑嘅係政府眼見市民失業到無隔宿之糧，竟化身財務公司叫人借錢？對於一個餓漢，不是直接給他一碗米飯嗎？對於一個長久失業者，不是直接派錢給他解決燃眉之急嗎？點解仲鼓勵佢先使未來錢？財爺擬設立「百分百擔保個人特惠貸款計劃」，向失業人士提供最多8萬港元貸款。財經事務及庫務局局長許正宇出席立法會時表示，期望貸款計劃設計上盡量寬鬆，申請人須提供失業聲明，為避免濫用，申請人要支付1%利息，以增加還款成本，令公帑用得其所，強調如借款人可按時還清貸款，則可收回全數利息。

表面睇來，政府咁幫到手，點到好過叫失業人士向大耳窿借或碌爆信用卡，利疊利，息口驚人，分分鐘賣腎都唔掂！之不過，有議員關注計劃未能惠及放無薪假嘅市民及應屆畢業生；有勞工顧問委員會勞方嘅代表更指出，依家受疫情影響，好多工友開工不足，被迫放無薪假，佢哋急需財務周轉，亦有足夠能力還款，但就末能申請有關貸款，批評港府古板，將佢哋拒諸門外，質疑當局係「為做而為」。

唉！政府推新政策，有邊樣係思慮周全㗎？施政不是被批堅離地，就係被市民怒斥不食人間煙火。試問有唔少基層係疫情下，根本開唔足工，如果一個月得二、三千蚊收入，點解又唔可以申請「特惠貸款計劃」呢？

許正宇仲要廢噏甚麼「復活蛋」理論，話幫唔到所有人！其言辭之涼薄，係典型嘅飽漢不知餓漢飢！政府成日話民生無小事，口口聲聲話要與民同行！可惜講一套做一套！整個政府由特首至三司十三局，民望長期低下豈是無因！「桃李原無松柏心，鴟梟強作鳳凰音」！為官一任，未能造福一方，民生畢竟不是抽象空洞嘅理念，高官個個高薪厚祿，施政離地，稍一被批評，又話受到「文革式批鬥」，作為蟻民卻任由佢哋魚肉戲弄，認真吹帳！

原圖：星島日報

https://std.stheadline.com/realtime/article/1502074