前年黑暴期間，社會動盪，雖然《港區國安法》落實後，港獨派不至再明目張膽，惟攬炒思潮仍在蔓延，尤其民主派主導嘅區議會更淪為黑暴基地，政府終於修例要求區議員宣誓，正本清源！今後一眾黃絲攬炒派區議員必定冇運行！要言之，違誓者將被DQ、5年內禁參選，虛假陳述最高囚7年！

筆者早前曾指出，過去一年，除咗唔少公僕被捕，亦不乏攬炒派區議員，好似沙田區議員李志宏，便因涉嫌喺公眾地分作出喧嘩或擾亂秩序被捕。去年11月，警方以涉嫌串謀詐騙，拘捕元朗區議員王百羽、九龍城區議員李軒朗等；其中王百羽嘅住所更被搜出仿製武器，包括8支仿製長槍、17支仿製手槍、仿製彈藥及一把木弓。

修例就能堵塞漏洞？

講真，咁嘅區議會議員，又點止涉及公職人員行為失當咁簡單？佢哋任期4年，過去1年已圖窮匕現，曾國衞局長，只修例就能堵塞漏洞嗎？

今次修例，話就話冇設追溯朝，但曾國衞強調當法例通過後，會視乎實際情況而決定是否需要一併考慮宣誓者過往作出嘅行為。

至於現任區議員岑敖暉、梁晃維、袁嘉蔚及鄭達鴻去年參選立法會選舉時，被裁定不符合參選資格，被問到一日修例通過後，4人會否即時被DQ？曾國衞指理論上應會DQ！

事實上，上述4人已聞到燶味，知道「命不久矣」，紛紛係社交網站留言。好似新婚不久嘅岑敖暉就話喇，聽聞除咗被DQ外，仲會被追討2020年7月31日後嘅薪酬和開支。跟住話鋒一轉，就寸嘴咁講「然後我就覺得呢d（啲）時勢，真係窮有窮好：戶口有幾十萬既（嘅）俾人追到破產真係會肉痛，但由於民政扣左（咗）好耐開支既（嘅）關係，小弟戶口就係得咁多錢，你咪慢慢追ｘ飽去」。接着還貼出自己嘅戶口結餘截圖，得0.6元！

唔DQ佢永冇寧日

另一個袁嘉蔚就引電影對白「牌品唔好即係人品唔好」，批評政府「見到勢色唔對」就反枱，又阿Q式咁認為係政府「驚香港人」。

看官！你話香港何其不幸！搵着啲九唔搭八嘅人形物體做區議員，旨意佢哋服務地區嘅街坊，慘過向石頭搾出血！一眾攬炒區議員根本唯恐香港不亂，好似沙田區議員黃文萱辦事處，竟反掛「光復香港，時代革命」旗幟，咁嘅區議員，直頭掛羊頭賣狗肉，唔DQ佢香港永冇寧日也！

如今政府要「正本清源」，筆者鼓掌以迎！除惡務盡，才可還香港歲月靜好。

原圖：星島日報

https://std.stheadline.com/daily/article/2320124/