過去一年新冠肺炎肆虐全球，國外不少謀體都把2020年定義為「災難之年」！事實上，這個「非常之年」港人感甚殊深！

第四波疫情持續至今仍反覆無常，確診個案彈上彈落，惟仍難跌至單位數；政府卻晚晚玩突襲式「封區」，做足大龍鳳，之前封區屢食白果，行動往往「雷聲大雨點小」，搞到居民人心惶惶！政府無能，懲罰市民，點會冇民怨呢？早前林鄭由工作人員陪同下到達佐敦文英樓一帶視察，沿途有市民叫囂宣示不滿，甚至以粗口對其指罵，可見突擊封區十分不得民心！

鬼咩，突擊下難免發生唔少「意難平」之事，好似話有市民係提款時被困櫃員機範圍；有探訪朋友後兩公婆被困，走唔甩唯有被迫係朋友屋企宿一宵；你知香港地，一般家庭居住環境都逼狹，「留食不留宿」是常識吧！依家被困係人家居所，確實十分無奈！此外，有染髪染咗一半，狼狽到包住保鮮紙抱頭就走，真係慘過做賊！又有剪完髪無得走，40人被迫困店打地鋪，慘過走難！至於第日解封，政府就話早上7點前，之不過經常過時，搞到趕住返工搵食嘅市民同工作人員扯火！

料初七起 開放晚市

筆者草此文時，政府就話市民對農曆新年十分重視，加上疫情有放緩趨勢，食衛局局長陳肇始日前終宣布，計劃於大年初七起，有條件放寬實施超逾兩個月嘅社交距離措施，包括食肆可放寬至4人一枱，而晚市堂食則可延長至晚上10時，當然，其中有許多防疫規例要遵守！之不過，對吊緊鹽水嘅大部分食肆都算打咗支強心針，畢竟再禁晚市，市民冇啖好食，許多食肆更肯定要排住隊等執笠！

鼠去牛來，新一年，筆者都想「物以終為始，人從故得新」！講真，活到這把年紀，想「得新」也搞不出甚麼花樣，但求「平安」兩字，不要出入公立醫院！有空讀點閒書，仍有精力寫幾篇稿騙幾文錢稿費，以資食幾碗雲吞麵，如此而已！亂世求生，目標那敢定得太大！自知運氣向來麻麻！是以從不求神問卜！

嗱！有媒體為一眾問責高官到黃大仙祠求籤問運程，通常凶多吉少，唔多老利！眾高官中，獨政務司司長，人稱「肥仔張」嘅張建宗，於「非常之年」求得第一上上籤「姜公封相」，筆者真係想唔對大仙佩服得五體投地都唔得，張今年七十歲仍位極人臣，手擁9項物業成高官「樓王」，解籤師傅指其仕途大抵未必能「再進一步」！阿哥，以古稀之年馳騁官場如此多年，做到面面俱圓，身家豐厚，點計都贏到滿天霞光啦！「牛兆豐年」佢老哥應感受最深！

原圖：文匯報

https://www.wenweipo.com/a/202101/23/AP600be1cae4b0adf0a0829de7.html