疫情持續嚴峻下，打工仔今年年關難過！

勞福局局長羅致光尋日公布，本港經濟現處於深度衰退，加上失業率高企，最低工資委員會向特首及行政會議提交報告，並獲接納凍結最低工資水平，維持係時薪37.5港元，係歷來首次。

團體怒轟政府涼薄

換言之，本港約2萬名基層僱員一毛錢也冇得加！其實，最低工資每兩年增加金額亦不過時薪2蚊至3蚊，由2011年嘅28蚊加到2021年嘅37.5蚊，今年又話凍結！基層打工仔每兩年等加個2蚊幾毫都幾辛酸！有團體就斥政府刻薄窮人，令人憤怒！指即使政府全資補貼每小時2蚊增幅，全年亦只涉及約1億港元，認為最低工資應按通脹調整，增至39.1港元，以確保基層購買力不變。

根據報告，領取最低工資嘅2萬多名工人，當中逾半從事物業管理、保安及清潔行業。翻查資料，同期全港僱員每小時工資中位數為73港元，比之現時最低工資水平高出近倍。事實上，即使加2蚊，又點確保基層購買力不變吖？依家啲大型餐飲店，甚至茶餐室一個早餐都不經不覺加兩蚊啦！至於午市套餐，加價分分鐘都要5至6蚊啦！啲高官薪高糧準，司局長級一個月逾3、40萬元！佢做一日，基層打工仔做足一個月都未有咁多，你話佢哋又點會「急市民所急」吖！

呢，羅致光局長又話最低工資不應被理解為解決低收入人士和在職貧窮嘅唯一方法，唔夠錢使可申請綜援，低收入家庭可申請在職家庭津貼。唉！筆者都唔明，點解啲老人家駝着背仲要周街執紙盒，有「神童局長」之譽嘅羅局長咁幫你，仲咁犯賤？唔通前世未捱過？或者係都要發揮獅子山下精神，「鬼叫你窮啊！頂硬上啦！」之不過，依家百業蕭條，經濟凋敞，昔日繁華熱鬧地區，今日吉舖處處圍城，搵工邊有咁易！

百物騰貴年關難過

就快過年，諗起百年黃大仙祠，今年首次於年三十晚閉園，善信無緣興高采烈爭上頭炷香，內心失落實在筆墨難以形容！ 筆者直頭覺得今年唔慌老利！呢，話說內地人民出版社推出「五福迎春」新年禮盒，好衰唔衰，其中一幅揮春由5個唔同行書嘅「福」字組成，竟有個「禍」字，「五福」變「五禍」，認真大吉利是！

點講都好，今年日子肯定難過，筆者想起抗戰時期，物資嚴重短缺了，當時有一副過年對聯：油條已貴，燒餅更昂，看指數才漲三成，勒緊肚皮辭舊歲；破帽難縫，寒衣未剪，念物價早過十倍，裝何面目拜新年？確寫活當年老百姓過年之淒酸！

香港基層市民，當知新鮮豬肉已貴，活雞更昂！賣雞嘅雞佬話比筆者知，來貨少咗，疫情下多咗「疫景廚神」，啲雞價有乜辦法唔貴！要言之，小市民今個年關肯定難過！當真「裝何面目拜新年」？

「神童局長」話綜援幫到你，在職家庭津貼幫到你！筆者就係唔明：何以民間如此多怨聲？佢哋唔通鍾意無病呻吟？

原圖：頭條日報

https://hd.stheadline.com/news/realtime/hk/1990308

https://hd.stheadline.com/news/realtime/hk/1581598