立法會議員葛珮帆上月去信司法機構，要求派代表出席立法會司法及法律事務委員會，討論設立量刑委員會及監察司法人員委員會嘅建議。然而，司法機關日前回覆葛議員時僅表示會檢討法官投訴機制，又繼續死撐現時上訴及判刑覆核已有效回應訂立量刑指引嘅訴求，拒絕派員出席會議。

呢的完全係「好好好，睇唔到」嘅高傲嘴臉，高高在上，司法機關就是「神聖不可侵犯」！難怪葛議員咁勞氣，狠斥其如「獨立王國」、「好難推得郁」，質疑新任終審法院首席法官張舉能甫上任就拒絕讓代表出席會議，等於提早對推行司法改革「落閘」！

張舉能剛履新，成為香港回歸以來第三任終審法院首席法官。通常「新官上任三把火」，之不過，呢位新官似乎略嫌冇火！去年對司法機構嘅投訴急升，無疑反映市民覺得公義未能彰顯，因此社會上唔少聲音都強調司法制度改革刻不容緩。

可惜吖，張舉能認為「法官必須自我克制」，你估個個可以話克制就克制咩？係就冇咁多偏頗嘅判決，令社會譁然啦！

對偏頗法官投訴多不成立

過去一年多，面對黑暴，法官判刑時常予人毫不「克制」，甚且十分浮誇之感，譬如說「喺暴動現場見證歷史」、「掟汽油彈係優秀嘅細路」，難怪市民投訴案件判刑冇統一標準、透明度低，法官「鍾意點判就點判」。尤其令大眾搲晒頭嘅，就係對偏頗法官嘅投訴多不成立，被投訴嘅法官甚至可獲升遷，令市民覺得現時欠缺制度監察法官，咁算唔算「司法獨大」吖？

「司法獨立」向來被視為神聖不可侵犯，之不過若然「司法獨大」甚至大到「自我賦權」仍然可以任其「無翼而飛」呢？

「無翼而飛者，聲也」，呢句話出自春秋時代法家代表管仲，佢指冇翅膀也能飛嘅，就係聲音！當年，管仲嘅目的在勸戒齊桓公，作為一國之君王，講出去嘅話對整個國家百姓產生巨大影響，因此務必謹言慎行。管仲嘅「無翼而飛」同張舉能嘅「自我克制」論本質有相通之處，問題係若法官未能克制，咁喺刑事方面考慮設立量刑委員會實有必要。

走了馬道立，接任嘅張舉能顯得任重而道遠，因為馬道立在位時劣評如潮，不肯改革司法獨大嘅陋習。可惜如今來了張舉能，依然「好難推得郁」，被批「原地踏步」，令人失望！筆者都希望佢經過慎思後有返啲火，並拿出勇氣對司法亂象來一次痛快改革，令司法制度重回正軌，並應立法會議員之邀派員出席有關會議，盡快訂立量刑指引，叫市民對法治重拾信心！

原圖：星島日報

https://std.stheadline.com/politics/article/1304225/

https://std.stheadline.com/daily/article/2321632/