新一年開筆，是否會更好？相信不少人未敢作如是想。這年頭，不說「發財」事了，能夠「平安」活着，已是上上大吉！

嗱！《柯林斯詞典》將「封鎖」（lockdown ）評為2020年度詞彙。同時入選年度10大詞彙的還有社交隔離、強制休假等。天氣嚴寒，而經濟嘅寒冬確令人不好過，筆者許多朋友失業，有些被迫放無薪假！下個月過年，筆者相信唔少人講唔出「恭喜發財」！建議祝福彼此「平平安安」，尤其係出出入入！

2020年是被全球新冠肺炎疫情主宰的一年！筆者認同「封鎖」這個年度詞彙！疫情封鎖咗我哋工作、學習、食飯、社交等方式！依家英國、南非又話有變種病毒，許多國家不得不進行第二輪鎖國封關！筆者只好感嘆：在有飛機嘅時代，「又要飛喇」已變成「都唔知幾時先可以飛」！

阿哥，唔好話飛去日本、韓國或台灣，想去深圳都唔容易吖！新一年嘅1月5日上午10點起，由香港經深圳灣口岸入境深圳嘅人士，除必須持有24小時內嘅核酸檢測無染疫症外，亦須出示14日集中隔離醫學觀察期間將入住嘅酒店預約確認單，未符以上規定，將不能入境深圳；假如有關人士未能入境深圳而折返香港，或須接受強制檢疫14天，市民應特別留意！想飛，識插翼都冇夠易！

新一年開始，筆者只希望香港一眾庸官抗疫，切勿再自把自為或一付「難得糊塗」嘅模樣！唔該打好12分精神，提高警覺和效率，不要自以為是，不懂謙卑自以為「香港規格」防疫掂過碌䉀，結果處處漏洞，致令疫情持續至第4波而一發不可收拾！

事實上，澳門抗疫成功，有一點必須承認，就是關口守得夠嚴密。論者指出，係澳門關口，要再經衛生官員查核酸檢測證明，然後由警察帶隊，一車車去山頂鏡湖醫院再做核酸檢測，做完就原車車去分配好嘅隔離酒店，登記入住，上房前警察派回身份證。全程閉環管理，新入境者唔會接觸到其他澳門人，無身份證也走不了。

澳門檢疫，不似香港早期，自己搭車去酒店或返屋企，過程中感染司機又得，去食餐飯感染侍應又得，返到屋企，感染老婆都仲得！完全無掩雞籠，迨至上年12月下旬先至有全面指定酒店隔離。喂！咁仲唔係後知後覺？抗疫如打仗，豈能凡事慢九拍，一幅「雲無心以出來岫，鳥倦飛而知還」嘅態度，疫情唔爆到九彩都對你唔住啦！

筆者話就話唔敢相信明天會更好，之不過，人冇夢，的確如星爺所講：同條鹹魚有乜分別？筆者年紀愈大，希望愈卑微，只想人間四月天，能到澳門食碗水蟹粥、豬扒包和拉吓老虎機，當然，能到深圳購書、洗吓腳修吓死皮，咁就心滿意足啦！

原圖：點新聞資料片段截圖